أغنيـــــة لمحمـد نصــر يــــس
قصيدة للشاعر الكبير: حمدي منصور
شبابيك فى قلبى
آه يا قلبى
شبابيك لو تنفتح
تطل منها طيور خفيفه كالنسيم
بجناحات بيضا صَغيره
يبدروا فى الأرض حَب الحُب مغنى
يصبحوا الأطفال يغنوا ترانيم
يا عيون غلابه الحىّ يا أصحابى
أنا فى قلبى ضىّ
عايز أمد إيديا للميت
ينبض ويصبح حى
عايز يطيب النىّ
هاتوا أياديكم ..
هاتوا أياديكم
النيل اهو نايم وبيشخر زمان
مليان بلهارسيا وانكلوستوما وديدان
وفـ جوفه غطسانين عيال عريانين
عيال ممصوصين
زعازيع من عيدان
والنيل أهو نايم عويل مرضان
لا ماشى جنب البيبان .. ولا حتى له ودان
ولا حتى بيجرى فى القرى .. زى كلام الشعرا
يا مصر ياقمره
يا جميله يا بنت بنوت
فيكى البكاره متوحشه النبوت
لما يغز.. يفوت
وتزغرد الصرخه
وتكبر الفرحه
حمامه بيضا تحلق ع البيوت
يا مصر يا قمره ولا قمر
أصل القمر حجر
وشبهوكى بيه كتير شعرا
يا مصر يا قمره ولا قمر
يا مصر يا قمره ولا قمر
قومى وازرعى زهره
ردوا جوابى
ادونى لحظة صدق
وخدوا البقيه الباقيه فى جراب شبابى
حبيبتى كانت تطل عليا
وانا واقف فى ريح بابى
وكان جسدى نضيف جوه تيابى
راحت ملامح البيت وملامح حبيبتى
وانا اصبحت جوز عيون بيبحلقوا فى الفضا
إياك تقولوا دا قدر أو دا قضا
إحنا يا اصحابى اللى نصنع القدر,
واحنا اللى نصنع القضا
لا نقعد ع الكراسى
... ونقول آه يا راسى
ولا نقول كان وأيام زمان
ولا نقول ماضى ومضى
تعالوا نبحث فى القرار ..
عن قرار ...
......... ولا فرار
(فالبحر من خلفكم والعدو أمامكم)
ولا تهابوا البحر
ولا تهابوا النار
لا فرار مع القدر,
واحنا اللى نصنع القضا
لا نقعد ع الكراسى
... ونقول آه يا راسى
ولا نقول كان وأيام زمان
ولا نقول ماضى ومضى
تعالوا نبحث فى القرار
.. عن قرار
........... ولا فرار
( فالبحر من خلفكم والعدو أمامكم )
ولا تهابوا البحر
ولا تهابوا النار
ولا فرار
لا فرار
لا فرار
بنشيعوا الميتين
ولا نسألوش بعضينا ماتوا ليه
وكل واحد فينا بيغمّض عينيه
ويكتف إيديه..
ونخجل م الخجل
ونرد على عجل
ونقول دا أمر الله
بنموت ونحيا فى النبات اللى طالع
وفــ كل عام راجع علينا .. ما طالع
ونعود فى العشيه تحت جدران البيوت
فى كل واحد فينا شيء يحيا وشيء بيموت
ونموت ونحيا .. والحياه بتفوت
وبنسرق اللقمه من قسوة العتمه
وبنقتل الحرمان فى قسوة النبوت
لا ضيّ ولا بريق فى حيّ
لا شمس ولا هدير ولا سراج منير
لا ضحكه ولا لمّه ولا فرحه جوه البيوت
بنموت عشان نحيا الحياه فى الموت
وآدى أيادينا .. راخيه أيادينا
والسفاين رابطه ع المينا
لا مشينا بالقريه, ولا وصلنا المدينه
لا رحنا ولا جينا
لا خدنا ولا ادّينا
وآدى أيادينا ..
راخيه أيادينا
وعنينا مش بتبص فــ عنينا
ميتنا مات وشيعوه أغراب
لا قمنا بالواجب ولا وقفنا
ولا حتى واسينا
وطفينا ع النيل زيت القنديل
ونعسنا فــ الضهريه... نحلم شويه
بالمراكب وبأزيز النخيل
فى الحلم كان إنسان
فى عرض الأرض مرفوع للسما
فتح عينيه رأى نفسه أهبل عويل
رح ننعسوا فى حلم بس طويل
ونسافر السفر الطويل
نرسى على شط الغرام
فى مراكب الليام
وننقتل فى النهار وننتحر فــ احلام
دايمًا عيون الناس بَاشِمّ فيها البلا
عصافير .. تقع .. متقصقصه الأجنحه
بتحلم ع الكراسى بالنسيم والخلا
داخت من المرجحه.. متلحفه بالعذاب
والذاكره فى غياب .. .. .. .. .. ..
نفسى أنام حبّه .. وأصحى ..
وشعر راسى بتلعب فيه إيدين شابه
وإيدى تنعس فى إيدين
وعنيه تنعس فى العينين
ع الأرض نتقلب
فى الأرض نرسى .. ثم نتغرب
وفى الشروق نتلفّ فى اللبلاب
نبدر فى بذر القمح بذر الرمح
فى وتر الرباب
ونسمع ضحكة الأعشاب
ويهزنا الطَّبَّاب
وأنا ألاغى الذىّ فى كل حىّ
وأشم ريحة الأرض .. ريحة الخد
واتولو فى عمق الأرض
تحت الساق وتحت الغاب
ويعلى النفس فى القفص
واحلب فى ضرع الجاموس
واعرفها فى الزابور وفى الناموس
تدوس .. أدوس
وأعرف سككها وأجوس
مدن وبلاد ..
ننجب .. بنات .. وولاد
*******
