إلى من شرب دمنا الزكي و ما ارتوى
...
..
.
إنت تطلع مين يا عم ؟؟
.
مش مهم
.
إنت واخد كل حاجة
.
و أي حاجة
.
مص دم
.
إنت أعمى
.
أو أصم
.
إنت تطلع مين يا عم ؟؟
..
.
إنت ساكن برج عاجي
مِشـَطـّبـُه بفلوس علاجي
حتى إحساسك زجاجي
ينكسر لو اتصدَم
.
إنت تطلع مين يا عم ؟؟
..
.
إنت أصلك من زمان
ندل جدا ألعُوبان
شيء معشّـش ع الحيطان
فوق قلوبنا والقـَدَم
.
إنت تطلع مين يا عم ؟؟
..
.
إنت ناصح في مجالك
م الهوا جمَّعت مالك
والأكيد إنك ما جالك
مرة واحدة عُسر هَضْم
.
إنت تطلع مين يا عم ؟؟
..
.
إنت جيتنا من العَدَم
شيء ردئ زي الرمَم
كل خيرنا فـ خزنتك
واحنا جالنا فقر دم
.
إنت تطلع مين يا عم ؟؟
..
.
مرَّة دقن و جلابية
.
و مرَّة ناشط باع فضية
.
و مرَّة خصخصت التكيَّة
.
و مرَّة عملولك صَنَم
.
أنت تطلع مين يا عم ؟؟
..
.
إنت كُتلة من العيوب
حتى لو إبليس يتوب
إنت ماسك في الذنوب
.
إنت مصدر كل هَم
إنت تطلع مين يا عم ؟؟
..
مش مهم
.
إنت واخد كل حاجة
.
و أي حاجة
.
مص دم
.
إنت أعمى
.
أو أصم
.
إنت تطلع مين يا عم ؟؟
...
..
.
أيمن عبد المقصود
