أمه الجدة...للشاعر: ياسر أبو جامع

عليكى عقب شقاوة يا جدة
تتولدى فى بلاد فقرانة
كَلْ جنبتها حصير الحلف
و كَلْ من عمرها كل رواق
مفتتح:

الجدة
عقل البيت الموزون
ماتت زعلانة
علشان بتها وآخر نبتة أرضها
دكتور الوحدة قالها:
"أرضك بور"
نامت زعلانة
صحيت نادرة للرحمن الصوم
وحالفة م تخطى على أرض
يملكها واهب الفرحة والكرب.......

"أمه الجدة"

يا أمه
عقلى أمر من شوارع المدينة فى يوم السوق
كل الفكر
مد أقدامه ورايح جاى فى الراس
والشوق ليكى أمر إحساس يا أمه الجدة...
يا أمه
فين حكاويكى تحت القمارى
وأنا نايم على رجليكى
ومتهيألى إن حكايتك دايرة فوق الغيمة
وإنى بتفرج والسما سيما
وأما كبرت
لقيت حكاويكى قايسه الأرض
وقارية الناس يا أمه الجدة

- "أفندية بت عيتلة" ماتت
وخالتى زينب هى اللى خدت أبو يا من وحدته،
وهى اللى ضفرتلى شعرى ليلة الحنة وأنا بت 11 عام
وهى اللى كحلت لى عينى بالمرود
بعد م حنت لى
وحنتلى كفى وكوعى ورجلى
وغمضت يدها ع الفرحة وخبطتنى فى كتفى
وقالت لى:
"بكرة هتكونى مرة يا قارشة أمك
لا تبوحى بفرحك ولا همك
وتراعى لبيتك ولراجلك
إوعى يبات ف ليلة مهاجرك"
ودمعت عينها م الفرحة وزغرتت، وأنا قلبى حس بشى غريب-

خجلت جتى وقالتى بفرحة:
-كت عيلة صغيرة
ومش خابرة هو اللى بيحصل بين المرة وراجلها
عيب ولا مش عيب
لكن أقولك أنا خفت،
مات جدك وأنا فى التاسع
شايلة ف بطنى الواد اللى رزقنى بيه الله بعد خمس عيال
راجلين وتلاتة بنات،
روحه زغرتت وحلوق عويلاته مفتوحة
كان حنين قوى يا وليدى وإيده مفروطة..
عمره م شال للغدر قروش
والموت غدار
ولا يعرفشى مين معاه ومين معهوش،
كل اللى بتاجى ساعته يموت
وحدى ربيتهم من بيع الفراخ وخضار السوق-
وتقول الجدة وعيونها ترقرق بالدمع،
وأنا أطرطق ودنى وأحاول أجمع صورة الجد من وسط الغيم،
عمر الصورة م كملت يا أمه
جدى مات
قبل ماتوصل لبلدنا الكامرا
أو يدخلها النور.......

شرب الفقر من كيعانها
وشبعت م الشقى طول العمر
تصحى من الفجر
قبل م تصحى الزرتزير
قفص الفراخ ع الراس
و فى الإيد إيد واحدة من البنات
والواد ع الباط
وتطلع ع السوق
السبت
فى سوق السبت
الأحد
فى سوق الأحد
طول الأسبوع في سوق
عليكى عقب شقاوة يا جدة
تتولدى فى بلاد فقرانة
مفيهاش عطلة للأسواق

-غلبونى العيال يا واد بتى,
خالك كان ضريان* يهرب م المدرسة, وأنا كان بدى أعلمه.. مش عوزاه يطلع مزروعة فى ايده العتلة يقلع بيعا أوتاد الله، ويتنقل بكاسوره من العقبة*، للسمدون، لكلابشة يكسر فى حجار أسوان الصوان,
والتانى
كان يخجل ياجى معايا السوق
كان يستعار يشيل قفص الفراخ الفاضى.. وأنا عزراه,
م أنا يا وليدى لولا اللقمة ووش المرحوم اللى بيضحكلى كل م أغمض عينى م أنا شيلاه,
لكن مقسوم
واللى مقسوم له الشقى يلقاه...-
عليكى عقب شقاوة يا جدة
تتولدى فى بلاد فقرانة
كَلْ جنبتها حصير الحلف
و كَلْ من عمرها كل رواق
ــــــــــــــــــــــــــــــــــــــــ
- ضريان: متعود
-العقبة, السمدون, كلابشة: مناطق جبلية بأسوان

بابا َأبح... للشاعر: أبو الخير بدر

هوه ايه مابنش لسه
كل شيئ أصبح متاح
لما فيفى تبقى ماما
كلنا من نيلها نرضع
كلنا يبقلنا فيها
لينا مرتع
قد ايه بعد الشقا
يبقلنا صدر ننام عليه
واما أفكر أجيب هديه
فى عيدها أييييه !!!
شال قطيفه ؟
زى شال أمى اللى جبته
قبل ماأتسمى بيتيم
بس أمى أيديها كانو مشقاقين
والعجين ماسك فى شلها
وهى بتلت العجين
والمجور طافح مدلدق
من سمار أمى اللى مايل
لونه خمري
والعجين اللى اتعجن
من عرقها
اللى ساقط من جيبنها
طعمه مالح
شفت لون خمرى الملامح
لما طل ف وش أمى
كان خميره للعجين
اللى طافح م المجور
فرق شاسع
بين خميرة الكاسات
والبارات
والصاجات
وَخمر أمى
شفت صاج أمى اللى بتقرص عليه
شفت فجر أمى اللى بتشد المطارح
لجل مترحرح رغيف
شفت ايدها وهى بتملس عليه
وترش وشه بالدقيق
فجرك انتى ياماما فيفى
يبتدى بشد الحاف
ِننا نااام
بخ ـ ـ بف
أما أمي
أمى دى لما بتخبز
كنت أكل من وراها
الرغيف والله حاف
حاف مفحفح
عالمه يامه
عالمه بالصاجات سما
سمانا مسرح
ع الشاشات بتهز ترعش
كل حاجه
م الرموش حتى الحوافر
عالمه بتأبح وتردح
النهارده كله يامه
بابا أوبح
واوه بوس
بوس هتدفى
ويبقى ليك ع الواوه مطرح
ياللى كنتِ ف الصباح
تصبح تسبح
النهارده الكل أبح
شفت يامه
قد ايه نزلين سلالم
بير غويط
بعد ما كان الملس
بيلف قدك
والجنان تحت القدم
مفروشه مرمر
فيه إيدين بتشده منك
عايزة تعرف تحته ايه
هوه ده يبقى التحرر
والتقدم والتمدين
ولى معرفش اسمه ايه
تبقى بلبوصه لعنيهم
تبقى بيكينى وبلاج
تبقى أي لينر وروج
مسكرا ومسخرا
تتووه ع الصره اللى باينه
وجنز ساقط من ورا
هوه ايه مابنش لسه
هيفا تبقى روح أبونا!!
سبكى يسبك صياديه
حمرا موت!!
هى ايه يابنى اللى حمرا؟
قصدى أقول حمرا
يا قوطة
حمرا جدا
حمرا خالص
حمره يامجنونة بينا
مجنونين احنا بهواكٍ
لما ماما تبقى فيقى
هيفا تبقى روح أبونا
دينا تبقى دين أبونا
والسمو يكون سما
سبكى سابك صياديه
حمرا موت
يبقى أحا
أحا خرجه محشرجه
مليان بلغم
صدري ده مكتوم وطافح
نفسى أطرش
بين إيديكم
لو سمحتم
ليا أطرش ؟
*******


أبو الخير بدر

سمير عبد الباقي .. عرضحالجى الغلابة ومندوبهم الدائم في المعركة.... ////// محمود الحلواني

سمير عبد الباقي .. عرضحالجى الغلابة ومندوبهم الدائم في المعركة
‏

ــ شعره احتفالية شعبية، تتعدد فيها النبرات الشعرية وتتجاور في نسيجها المرن والمفتوح فنون الشعب وأدبه.

ــ انتماؤه للكادحين والغلابة من أهله جعل من أشعاره سلاحا يشهره في وجه أعدائهم.



ـــــــــــــــــــــــــــــــــــــــــــــــــــــــــــــــــــــــ



" أنا أديب مش أدباتي

بإيديه ولساني باهاتى

كلماتي آهاتي سكاتى

خرابيش عل حيط الزنزان"



يكاد سمير عبد الباقي يمثل تيارا وحده في شعر العامية المصرية، لم يغادر ـ عامدا ـ مرجعياته كشاعر عامية، وظل ممسكا بيد قوية على أصول هذا الشعر من فنون قولية عامية، وشعبية. يدبج منها شعره، واصلا بين جذور هذا الشعر وبين فروعه من ناحية، ، وبين الشعر وبين منتجيه من الفلاحين وغيرهم من مبدعي الأدب الشعبي على اختلاف أداءاتهم وأدواتهم من ناحية أخرى، وبين هذا الشعر وجمهوره الطبيعي من ناحية ثالثة. كما يقف عبد الباقي ــ أيضاـ على رأس تيار قررـ عامدا ـ أن يظل محافظا على وعود شعر العامية المعلنة على ألسنة شعرائه الرواد في قصائدهم وفى أحاديثهم ، وتلك المضمرة ـ أيضاـ في كونه قد اختار لغة الناس مادة لتشكله وأداة لتوصيل رسالته، وهى تلك الوعود التى ترتبط بكونه ـ كلام الناس ـ وأنه ـ لذلك ـ لابد أن يعبر عنهم ويكون لسان حالهم الذي يفصح بلسان شعبى مبين عن آلامهم وأفراحهم ، أشواقهم و تطلعاتهم نحو عالم أفضل، في مواجهة عالم لا يقيم وزنا للفقراء والضعفاء ، كما لايقيم اعتبارا لقيم العدالة والحرية والصدق .

"الشعر صحبة كلام الناس ومشاعرهم

حتى امرؤ القيس لَحَن بأغاني سامرهم

فياللى عايز يكون فنك .. نغم وحياة

عبر عن الخلق .. ح تبقى شاعرهم ".

يمكن النظر إلى أشعار سمير عبد الباقي ـ إذن ـ بوصفها جسرا، لا محطة وصول ، هكذا اختار له انتماؤه للشعب ، فراح يمتد منهم وإليهم ؛ انتماؤه السياسي للكادحين والغلابة من أهله جعل من أشعاره سلاحا يشهره في وجه أعدائهم وظالميهم ، فصاغ أحوالهم حججا دامغة على مظلومياتهم ، لا تقيم الدليل فحسب ، لاتطلب ، بل تأمر ، تفضح وتعرى وتهاجم وتصوب الوخزات، تفقأ عيون الجبابرة والمتسلطين والمتنطعين والكذابين ، وتصم آذانهم بقوة . ومن ناحية أخرى فإن انتماءه لتراثه الفني، الشعبي، جعل من أشعاره جسرا بين شعبية الآداءات الشفاهية في الماضي وقصيدة العامية في الحاضر ، حتى بات شعره كرنفالا تتعدد فيه النبرات الشعرية وتتجاور في نسيجه المرن والمفتوح تجليات فنون الشعب وأدبه من حكم وأمثال وألغاز ونكت وسير وأغان ومواويل، وتلعب على مسرحه أراجوزات، و وأدباتية، ورواة للسيرة إلى جوار الشاعر والزجال .

" أنا الأراجوز النوزى

لا منتهز ولا مهزوزى

أنا الذى يوم العوزه

تلاقينى مطرح ما تعوزى

لو عزتى قمره اقطفها لك

لو بينى وما بينها مهالك

عفيف أنا ومش متخفف

من الهموم اللى ف بالك

وضحكتك فيها كفايتى

وقلبى على طرف عصايتى"

نسيج ثرى ومشبع ، يخاطب الناس بلغاتهم، ويحفظ لهم إرثهم أيضا ، وهى مسألة فنية وأخلاقية أيضا ألزم بها عبد الباقي نفسه، ورعاها في أشعاره وأزجاله ومواويله .

هذا التعدد والامتلاء بإبداع الشعب ليس وحده ما يميز النسيج الشعري لنصوص أشعار سمير عبد الباقي، وليس هو الحجة الأظهر على انتمائه لفنون وأدب الشعب، هذا هو الظاهر الواضح الذي يمكن لأي محلل رصده وتحريه ، إنما هناك ماهو أعمق من هذا المستوى وأكثر دلالة على ذلك الانتماء ، وهو ما أسماه ( والتر.ج.أونج في كتابه الشفاهية والكتابية ) بـ ( لهجة المخاصمة ) تلك اللهجة التى تسم كل إبداع شفاهي أصيل ، ولعلها أهم سماته على الإطلاق، وهى التى يمكن رصدها بقوة في أشعار عبد الباقي، تلك اللهجة التى تضع المعرفة دائما في سياق صراع محتدم، ، تنزل بها إلى ساحات النزال:

" في ساحة الشعر أنا فارس ومالي مثيل

ومهرتي فرسه حره من كرام الخيل"

دائما تضع لهجة المخاصمة مبدعها في مبارزة ، فهو إما يسلق خصومه بألسنة حداد كالسياط، و يضربهم بشمروخ الأراجوز أو ينزلهم منازل الإحساس بالعار بسخريته اللاذعة وتهكمه وشكشكته المدوية ، وهو في بعض الأحيان لا يستنكف من أن يذكرهم بالإسم :

" مالك يا أبنودي بالثورة - ماتستعبطش

أنت فلول بامتياز و نتاج زمان البطش

الثورة إيقاع صراع و هارمونيّة فكر

مش بعض من شعر باهت ح يأهلك للمانش

...........................

سد الذرائع، كفاياك كدب ع الأيام و بطـّل هتش"

وإما أنها( لهجة المخاصمة ) تستدعي الأصدقاء والجيران إلى ساحة التنافس والمبارزة لممارسة أنواع من اللعب الجاد ؛ كأن تتسابق في حل الألغاز والأحاجي، أو تثير الإعجاب بالنكت والفكاهة، أو لتأكيد التميز في تظهير المواويل، وإحكام المربعات و التسابق في تسميع المحفوظات والطرائف . وفى كل الأحوال فإن لهجة المخاصمة لاتعمل في فراغ التجريدات والمفهومات المتعالية ،أو لمجرد تمضية الوقت ، إنما تعمل لتحقيق مصلحة ما، أدناها الحصول على إعجاب الجمهور وتعاطفه ومشاركته الوجدانية ، وأعلاها وأبرزها تأكيد وإبراز عنصر البطولة ، عن طريق التغلب على الخصوم ، في أي لعبة أو معركة كانت حتى لو كانت القدرة على حل لغز أو إحكام مربع ، أو تظهير موال ، أو رواية سيرة . وهو تحقق مشروط بوجود مجموعات بشرية تنقسم بدورها ، بحكم لهجة المخاصمة، التى تسم الأدب والفنون الشفاهية إلى فرق وخصوم متصارعة ، يحاول المتخاصمون أو المتنافسون كسب معاركهم باجتذاب أشخاص آخرين إليهم يقفون في صفهم ، ينتمون إليهم ، كما يحاولون اكتساب تعاطف الجمهور ومشاركته الوجدانية.

" من يوم نطقت لقيتنى ميدان .. لكل أحزان الإنسان

غنيوتى لليوم الآتى.. عصايه في إيدين الغلبان "

وتكاد تجربة الشاعر سمير عبد الباقي لاتغادر هذه السمة الشفاهية الأصيلة التى تميز كل أدب يتصل بتراث الشعب، وبقراءة نصوص وقصائد الشاعر يمكننا إرجاع تلك اللهجة، لهجة المخاصمة ، إلى سببين مباشرين أولهما :الهم السياسي الذي يحرك الشاعر ويدفعه للكتابة ، حتى تكون " قصايده سيف ولسانه حصان " والثاني هو تلك المرجعية التى يستند إليها الشاعر في تشكيل قاموسه الشعري والاستعارى وهو الفنون والآداب الشفاهية ، الشعبية .

ولعل خير تعبير عن هذه السمة وهذا التوجه ( لهجة المخاصمة ) في أشعار سمير عبد الباقي هو ما صاغه الشاعر بنفسه في ( لا مقدمته ) التى وضعها لكتاب الشعر الأول الذي يحتوى 10 مجموعات شعرية والذي صدر عام 1991 " يقول فيها : " في وجه أدعياء الاشتراكية وأعداء الفن والشعر من أنصاف الموهوبين والأغبياء الذين استحلوا الوطنية والقومية والتقدمية واستحلبوها عطايا وامتيازات واستخدموا الحلم والفن مطايا للمزايا والملذات " وبعد عدد من الفقرات التى خصصها لفضح أولئك وكشف مصائبهم عاد وقال : " ومن أجل شرفاء التقدميين واليساريين المبدعين من أبناء هذا الشعب من الموهوبين الحقيقيين ـ المظلومين والمقهورين والمرفوضين .. الذين التزموا الشرف والحرية والفن الإنساني الجميل فألزموا القهر والفقر (......) في وجه أولئك ومن أجل هؤلاء وغدهم الأفضل والأجمل أطلق آهاتي وصرخاتي قصائد وأغنيات وأزجالا لعلها تسمع أصما .. أو تنطق أبكما .. أوتنزع القناع عن كاذب أو تكشف ستر متآمر .. لكي يأتي يوم يسقط فيه كل الطغاة الصغار .. من المتحكمين في حقول اليمين .. أو المفسدين في حدائق اليسار .

"يعيش مبارك ألف عام- محمي من الموت الزؤام- ومن العته ومن الفصام- ومن الكساح ومن الزكام- ومن الجرب ومن العجز ومن الجذام-عاش مستقيم ومستديم ومستدام... يحميه من السم الخفي في لقمته- يرقيه من الكدب اللي بتدسه الغباوة في كلمته- ينجيه من الغدر اللي في عيون اللي عايزين يورثوه- ومن اللي عايزين بالحيا- في قلة حياء يكفنوه".

ربما من أجل ذلك نجد أن أبرز الصيغ وأكثرها دورانا وحضورا في أشعار سمير عبد الباقي ، هي صيغ التهكم والسخرية والتي يليق بها أكثر أن تحصل على مسمياتها من قاموس لغة الشعب ، وليس من سجلات الأدب و النقد ، يعنى أن نقول صيغ : التلسين ، النأورة ، النأوزة ، المألتة وما إلى ذلك من أساليب استقاها الشاعر مباشرة من إبداع روح الشعب وفنونه ، من المصري الذي ظل يقاوم بالنكتة، ويوقع العقاب بخصومه عن طريق التلسين وفنونه .

فرحان بشعري وكإنى ح اعدل الموازين

أشعل شموس اليسار واقصف ضوافر اليمين

نسيت بإنى غريب قى أمه أمية ..

حالتها ( شعرية ).. شوربه فى حلل ميلامين

...

ومثقفينها باعوها بدمغة التعين .

أنا المصري... قصيدة للشاعر: وليد فؤاد

أنا المَكتوم وأنا اللِّي بَاقولْ
وأنا المَسكوتْ برَغم الصّوتْ
أنا المَعلوم وأنَا المَجْهولْ
وأنا المَسفوك بحُكم المُوتْ
أنا البَاطِل وأنا المَبطولْ
وأنا المَغلوب وأنا الجَبَروتْ


أنا الحَركَات والائتلاَفَاتْ
أنا الجَمَاعاتْ وأنا الأحزَابْ
أنا التَزوير والانتهَاكَات
أنا العِصيان وأنا الإضرَابْ
أنا اللِّي بَقَرَّب المَسَافَاتْ
وأنا اللِّي سَاعَات بَكونْ كَدَّابْ


أنا الإعلام وأنا الإسْفَافْ
تَمَللِّي ملَبِّس البُهتَانْ بِتُوب الحَقْ
أنا اللِّي اتْهَان وعُمرُه مَا خَافْ
تلاَقوا بَاقيلي مِ الإنسَانْ يَادوبْ الـ (لاّء)
أنا اللِّي بَاتوه بِدونْ إنصَافْ
مَابين الكُفر والإيمَان وقَلبي انْشَقْ


أنا الرَّاديو وأنا السِّيمَا
وأنا اللّمبي وأنا كَتكُوتْ
أنا ابن تريزَة ونَعيمَة
أنا البَاشَا وأنا الهَلفوتْ
سَاعَات باصرُخ عَشَان قيمَة
وسَاعات باسكُت عَلَى المَسكوتْ


أنا العَامِل وأنا الفَلاَّح
وأنا الزَّارِع لأرض الغِيرْ
أنا المَطحونْ وأنا المِرتَاحْ
وأنَا المَمنوعْ مِن التَّغييرْ
أنا الزَّنقَة فِ وِسط بَرَاحْ
وأنا زَيي الغَلاَبَة كتير


أنا المِيري وأنَا جنابُه
أنا الإقطَاع وأنَا الطُّغيَانْ
ولَو غِيري الطَّمع صَابُه
مِن الأنطَاع أو الشُّجعَانْ
رَاح افتَح للنَّهَار بَابُه
وأغرَّق ليلي بالأحزَانْ


أنا حِطّين وأنا النَّكسَة
وأنا طَابَا وحدود شَلاَتينْ
أنا سِينَا ومِش هَانسَى
أنا شُبرَا وأنا التِّبينْ
أنا المِينَا وبَاب خَمسَة
أنا ابن القَاهِرَة تَلاتينْ


أنا النَّصرَاني والمُسلِمْ
أنا الخُوجَة وأنا الكَوَافيرْ
أنا الموجوع وأنا المُؤلِم
أنا الموقوف فِ خط السير
أنا القَاضِي وأنا المُجرِمْ
أنا التَّخريبْ وانا التَّعميرْ


أنا الشُّهَدَا أنا يَنَايرْ
أنا سَلَفي أنا إخوَانْ
أنا اللِّيبرالي والثَّايرْ
كِتِير أوقَات بَكون غَلطَانْ
سَاعَات فَاهِم سَاعَات حَايرْ
لكنِّي أكيد مَانيشْ خَوَّانْ


أنا الشَّفَاف وأنَا العَتمَة
أنا الواثِق أنَا المِحتَاطْ
أنا اللَّي بَخاف مِن الزَّحمَة
وأنا النَّشَّال وأنا المُلقَاطْ
أنا اللِّي مَاشُفتِش اللَّحمَة
عشان الفَصلْ فِ السَّلََطَاتْ


أنا اللِّي ليلاَتي عَ القَهوَة
وعَ الفيسبوكْ واليوتيوبْ
أنا اللِّي بَاعونِي عَلى سَهَوة
أنا المَكروه وأنَا المَحبوبْ
أنا الفِرعون عَشَان شَهوَة
وأنا الصِّديقْ وأنا أيّوبْ


أنا المَشهور وأنا المَثبوت
وأنا اللِّي فْ بَلَدي سَاقِط قِيدْ
أنا البُركَان وأنا المَكبوتْ
وأنا المِستَنّي عُمر جديدْ
أنا العُمر اللّي فجأة يفوتْ
أنا الفَرق اللِّي فِ التَّوقيتْ

************

وليد فؤاد

يا مصر أكيد وحشتينى... قصيدة للشاعر: طارق العمري

كلام الناس مدفينى ،، و حب امى
سؤال كل الجيران عنى،
و ذكرى مغامرة ويا صديق
و ضحكة فـ وش أطفال المدارس
إذا طلت عيونهم من شبابيك الباصات
و ناس ملمومة حوالين فول
فى عربية على جنب الطريق
و زير فخار فى عز الحر
كوز منه يبل الريق
وواد أشقى من العفريت
بكسر مراية بيشاغل
شبابيك البنات ببريق
و بنت بتسقى زرعاية فى بلكونة
بتقطر شهد مِ الأبريق
و أنا جامع ولاد الحى باتحدى ولاد تانيين
فى ماتش ما بين فريق و فريق
يا مصر أكيد وحشتينى و باشتاقلك
يا أحلى ونيس باعيش وياه فى ساعة الضيق
حبيبتى يا مصر و الله باقول للدنيا باهواكى
و مهما بتعملى فينا ... يادوب تشويق

***********

طارق العمرى

قناعة.. قصيدة للشاعر: أحمد زغلول

قناعة

نفسك هفاك
على طعم العنباية الطارحة
ف جنينة جارك.
نفسك
تستطعم حباتها ف بقك.
تتضلل تحت سماها ف يوم
وترشرش
عنقودها بعطرك
ملحوظة .....
حاول تسقى العنباية الطارحة ف دارك
ليشدعطشها ف يوم
حنيه جارك
...........

**********

أحمد زغلول

سامحيني.. للشاعر: أشرف جميل فايز

سامحيني
ـــــــــــــ

وسامحيني
عشان ماعدشي فيا الحيل أغنيلك
عشان صدقت كِدب العتمه في ليلك
عشان كسلت أضويلك قناديلك
عشان كدبت صوت بُكره ف مواويلك
٠٠٠
سامحي شكي وظنوني
في حبك ليا وحنانك
ونظرة يأس في عيوني
حاضنها بحزن علشانك
أنا دلوقتي بس يادوب
باذاكر تاني في المكتوب
ومكتوبلي ف هواكي أدوب
واعيش وأموت على نيلك
فسامحيني
٠٠٠٠
مافيش أعذار مادام الظرف
مرار طافح على كاسك
فسامحي كلمه لحظة ضعف
جرحت انا بيها إحساسك
دا غضبك مني يمحيني
ورضاكي عني يحييني
فباترجاكي سامحيني
ياغاليه وكملي جميلك
وسامحيني

٠٠٠٠٠٠٠٠٠٠

الصوره من إبداع الفنان ياسر أكرم دودين

بني آدم... قصيدة للشاعر: محمد الجمال

بني آدم

و كأنى اول مرة بحب
و كأنى اول مرة بموت

او زى متيم معشقكيش
و اهو مات ف سكوت

يا جمال العشق الباين لونه
على كل الألوان

و انا شكلى كفيف اخرس و أصم
متحاط بحيطان

كان نفسي احسك
كان نفسي اعيشك
كان نفسي اكون لو يوم انسان

و يروح الحلم بأنك ليا بعيد و يغيب
و تغيبي معاه

و أنا لسا متيم ف هواكى
بي لأ و أه

طب تهتى ف قلبي ولا أنا تهت
او يمكن حب ومش فكراه

مطرود من قلبك ولا جبان
مع انى حاولت أكون قلبك

بنى ادم

و تحصل حاجة ف السكة
تعطل خطوتى مشوار

أعيش ادور على الضحكة
و بستنى ليالى طوال

و اخاف ما الموت ومش عايش
اذا راح اعيش ورا أسوار

و لو طاردانى من قلبك
بسيبلك قلبي جوة الدار

بني أدم

بقالى فترة مش بكتب
وهكتب ايه

واذا قلت احبك واحبك
طب بحبك ليه

أقول ع الحب و لا الحرب
اقول على ايه

على عيونى اللى كانت
سارحة جواكى

على قلبي اللى
ضيع عمروا ف هواكى

تيجى اقولك .. بحبك

يللى كل الحب
يبكي يوم ما ينساكى


انا حكايتى مهش غنيوة ولا موال
انا عاشق و طعم الحب زلزلنى

بحبك لأخر نبض جوايا
ووقلبك ليه مهملنى

بحبك مش كلام يتقال
لهيب بعدك بيقتلنى


و أقول اسكت ومش قادر
وجوايا الحياة فكرة

و مهما تقسي أنا صابر
و ويايا أمل بكرة

اشوف الحب ف عنيكي
و تبقى القسوة دى ذكري

كما قلبي فريدة جوة تكوينى
واحدة وبس

أقولك او تحسينى
بكرة و أمس

و امتى اليوم ؟؟؟؟

ولا كتير على حبي
يشوف الشمس
.
.
*********


محمد الجمال

يا اجمل من لبس فستان.. قصيدة للشاعر: عبد الفتاح شحاتة

من بين خطوط الشيش
طالعت القمر
لما كنت بتلعبي حافية
وعاملة من الطهارة حصان
ولما مسكت بالريشة
وخالطة مذهبي بالوان
وراسمة الوردة في النن
وفاردة شراعك البستان
وجايبة العين على قلبي
وجادلة بنبضك الشريان
ونسمة عطرك الميمون
يهز شجيرة الشريان
وصبيتى بسحر عنيك اتوضا
ورحت اصلى للرحمن
بقيت في سجودى على صدرك
بحس برهبة زى زمان
واحس بخوف وتنهيده
وسحر وشوق بكل امان
ولما نبضك اتاخر
لقيت من موجك الاشجان
ياساكنة قلبنا الاخضر
وكاتب قصتك قران
ووصى رسول امتنا
بجندك خيرة الازمان
وعاملة عصير من ريقك
عنب كوكتيل معاه رمان
وزى الشهد دا لعابك
ووردك سحر او ادمان
صباحك ورد ياطاهرة
يااجمل من لبس فستان

سعدنى السلامونى: الشعراء الكبار يدفعون ضريبة تمردهم على قوانين المدينة

حوار منقول عن المبدع: ياسر أبوجامع

المدينة قذفتنى للشارع ولكنى مازلت قادرا على فرض قوانينى

سرياليتى وخيالى هو الواقع الذى يجب أن يكون عليه المجتمع

سعدنى السلامونى، القراءة والكتابة فى سن السابعة والعشرين، تمرد على مهنة نجار السواقى، وانتقل إلى القاهرة، من أهم أعماله، دواوين، رغاوى الألم، تصبح على خير، عضم خفيف، أول شارع شمال، وديعة فى البنك، دواوين فى الدرج، أرواح بتطير،.. وله عدة روايات شعرية، قدمه إلى الساحة الأديب العالمى نجيب محفوظ، حين قال للجرائد "لا خوف على شعر العامية فى مصر مادام سعدنى السلامونى موجودا"، تم ترجمة دواوينه إلى الانجليزية، والألمانية، والفرنسية، واختارته ألمانيا فى موسوعة الشهرة، ضمن أهم الشعراء فى الوطن العربى، مع صلاح عبد الصبور، وأمل دنقل، وأحمد عبد المعطى حجازى، وعبد المنعم رمضان، ويتم تدريس بعض دواوينه بالجامعة الأمريكية، "حقوق" قابلت الشاعر الكبير وأجرت معه هذا الحوار.

- كيف كانت حياتك فى قريتك، وما هى قصة عدم دخولك المدرسة؟

- قرية نادر، قرية ريفية كل مبانيها بالطوب اللبن، لم يكن قد دخلتها الكهرباء بعد، وهذا المجتمع له معتقده الدينى والأخلاقى من عادات وتقاليد، فهو مجتمع منغلق على نفسه، وكنت أسمع عن القاهرة التى تبعد عن قريتى حوالى 200 كيلومتر، وأعتبرها باريس مصر، ثم دخلت الكهرباء وتبعها التليفزيون، فكنا لا نصدق أن هذه البنايات العالية حقيقية، وأن النساء يمكنها أن تدخن مثل الرجال، وقريتى بالنسبة لى هى كوكب غيطان ومياه وسواقى ومساحات خضراء تربيت فيها وأثرت فى تكوينى، ثم بدأ التمرد على كل ذلك عندما أتى الخفير ليخبر والدى"الذي ورث مهنة نجارة السواقى أبا عن جد " أننى مطلوب للمدرسة فقال له والدى "اكتبوه ميت، هو أنا لاقى أأكله هو وأخواته علشان أعلمه"، هذا أثر فى نفسى بشكل كبير جدا فجملة "اكتبوه ميت" قضت على أحلام الأمس بالنسبة لطفل يحلم فى الغد بدخول المدرسة، وما زالت تؤثر بى حتى الآن، فكنت أذهب مع الأطفال إلى المدرسة فيطردنى المدرس ويحرض الفراش على ضربى، وهو يقول أنت مكتوب عندنا ميت، بعدها كنت أنتظر بزوغ الشمس حتى أنطلق إلى الغيطان والبراح بعيدا عن القرية التى رفضتنى، وأبى وأخوتى الذين نعتونى بالميت، ومن هنا بدأ التمرد الحقيقى، وبدأت أرى المجتمع من الخارج لأنى كنت رافضا أن أكون واحدا منه أشارك فى سلبياته، وفى نفس الوقت بدأت رحلة والدى الذى كان يرغب فى تعليمى أية صنعة، لكنه لم يفلح بطبيعة الحال، فاضطر إلى تعليمى صنعته وصنعة آبائه "نجارة السواقى"، فكان يأخذنى معه لتصليح السواقى، وبدأت أتأثر جدا بإيقاع الساقية، وأود أن أقول أن إيقاع الساقية يمكنه أن يخرج مدارس شعرية جديدة لو كتبنا على هذا الإيقاع، وأنا غير مسموح لى أن أكتب بهذا الإيقاع من جانب أشباه النقاد، الذين تحتفى بهم الدولة ويطلقون على أنفسهم نقاداً كباراً، فإيقاع الساقية مع ألون السماء تجعلك تشعر أنك داخل معرض لفن تشكيلى .

- متى تعلمت القراء والكتابة؟

- قررت وأنا أبلغ من العمر 27 عاما أن أتعلم القراءة والكتابة، لأنى شعرت أننى بحاجة للقراءة لأعمق تجربتى، وأحتاج للكتابة لإخراج هذه التجربة على الورق.

- كيف كانت رحلة انتقالك إلى القاهرة؟

- كانت رحلتى إلى القاهرة، بمثابة الانتقال من كوكب إلى كوكب آخر، ففى حياة كل مبدع مراحل أعتبرها أنا براويز، ينتقل الفنان طيلة حياته من برواز إلى برواز، وأقول فنان لأن الفنان هو الأكثر إطلاعا على المجتمعات، فخرجت من برواز الطوب اللبن والقرية والسواقى والمساحات الخضراء إلى برواز آخر ، برواز المبانى الأسمنتية، الجلوس على الكرسى، تقوم من فوق كرسى الأتوبيس، لتجلس على كرسى آخر فى إحدى المقاهى، مجتمع يمنع الجلوس على الأرض، ولذلك قررت أن أترك نفسى للشوارع، لأننى كنت أرغب فى تزويج المدينة بالريف،لا الانخراط فى المدينة والانجراف نحو عاداتها الغريبة عنى، وكان من الصعب جدا على أن تستسلم لى المدينة فأنا آت إليها بقوانين لا تصلح معها من وجهة نظرها، فألقت بى أكثر إلى الشوارع، ولكنى مازلت أمشى بقوانينى ودفعت الكثير ثمنا لذلك، مثلى مثل كل معظم الشعراء الكبار الذين رفضوا قوانين المدينة، وأوضاعها، كالشاعر فؤاد حداد الذى رفض أن يعيش بقانون المدينة المعلب، والشاعر أحمد فواد نجم الذى دفع من عمره 18 عاما داخل المعتقلات لكى يصنع قانونه الخاص، وكذلك يحيى الطاهر عبد الله، كل هؤلاء دفعوا ضريبة تمردهم ورفضهم الدخول فى طابور المدينة الإعتيادى.

- ما هى قصة رائد الفضاء؟

- عندما كنت طفلا أبكى لكى يوافق أبى أن يدخلنى المدرسة فكان أبى جالسا أمام بيتنا يحاول ارضائى، فمر أحد الموظفين من قريتنا وجلس بجوار أبى وسأله "مالك مزعل السعدنى ليه؟"، فرد عليه والدى وأخبره أننى أبكى لشدة رغبتى فى الالتحاق بالمدرسة، وأنه غير قادر على إطعام أخوتى فكيف سيعلمه، فالتفت إلى الموظف وسألنى" نفسك تطلع إيه يا سعدنى لما تكبر؟"، قلت له"رائد فضاء"، فضربنى أبى وزج بى إلى داخل الدار، وقال للموظف" عاجبك اللى عايزنى أعلمه، ده عايز يودينا كلنا فـــ داهية"، وكان لهذا الموقف أثرا كبيرا أيضا فى حياتى.

- من من المشاهير أثر فى تكوين شخصيتك وطريقة تفكيرك المتمردة على المجتمع؟

- كان والدى يعشق الدكتور"طه حسين"، من خلال مسلسل الأيام، ويتابع برنامج العلم والإيمان للدكتور مصطفى محمود، فكنت اجلس بجواره أشاهد البرنامج حتى تعلقت به جدا، وأصبحت متأثرا بمصطفى محمود، حتى أننى عندما كنت أضرب أختى الصغيرة ونحن نتشاجر، فتذهب لتشكو لأبى فكان يرسلها إلىّ ويقول لها أخبريه بأن برنامج العلم والإيمان قد بدأ، فكنت بمجرد سماعى ذلك أسرع إلى داخل البيت فيمسكنى والدى ويضربنى، وكان هذا الموقف يتكرر بشكل شبه يومى حتى لو كان الوقت ليس ميعاد إذاعة البرنامج، وذلك لعشقى لهذا العملاق مصطفى محمود، فهو من زرع بداخلى التمرد وعدم الانسياق والخروج عن المجتمع الملئ بالمساوئ ،واللجوء إلى الشارع، ومن هنا تبدأ الثورة من الشوارع.

- كيف ترد على النقاد الذين يصفون أعمالك بأن أفكارها شاذة ومجنونة؟

- لماذا لا يكون المجتمع به الكثير من الشذوذ عن المسار الصحيح، وأن سرياليتى وخيالى هو الواقع الذى يجب أن يكون عليه المجتمع، فأنا أحارب سلبيات المجتمع بأفكارى، فأنا دورى كفنان مبدع أن أعالج المجتمع بكتاباتى، والجنون لأننى رأيت المجتمع على حقيقته، فهناك عباقرة خارج هذا المجتمع "هم المرضى النفسيين"، طردهم المجتمع إلى داخل المصحات النفسية، فكل مريض من هؤلاء كون كامل متكامل لا يمكن اختراقه، فأنا تعاملت معهم لأننى أكلت وشربت ونمت معهم فى "جنينة التحرير"، حيث كانوا يلجأون إليها بعد أن يتم طردهم من المصحة، فمعظم هؤلاء أبناء عائلات حدثت لهم حوادث جعلتهم يرون أن صراعات الحياة تافهة ولا تستحق الدخول فيها، وأنا منذ 12 عام صدرت كتابى "جنون رسمى" بــ"أغلقوا المصحات النفسية، مصر كلها بتكلم نفسها فى الشارع"، فهى أول رواية شعرية لى تحدثت عن المصحات النفسية، وتمت محاربتى كثيرا عليها، وقيل أن الرواية الشعرية جنس أدبى جديد، ولكنى لم أتوقف وأتبعتها بثلاث روايات أخرى هى "أرواح بتطير"، "مخ وأعصاب"، "دافنشى".

- بماذا ينصح سعدنى السلامونى الشعراء الشباب؟

- لابد على الشباب أن ينتبهوا إلى أن الشعر ليس ما يكتب فى مصر فقط، أو فى الوطن العربى فقط، عليهم أن يتابعوا الشعر العالمى ويلاحظوا تطوره، ويذاكرون ذلك جيدا لكى يصبح لكل مبدع منهم مفردته الشعرية التى تخصه، ولا يقع فيما يقع فيه الكثيرين من الشعراء العرب، وهو التقليد لا الابتكار والتجديد فى الشعر، فعلى كل واحد منهم أن يكون نفسه، ولا يكون عجولا على تجربته، فالمبدع الحقيقى يظل يذاكر ويتعلم حتى آخر نفس فى حياته.

وداع قيد التنفيذ... للشاعر: عاصم المراكبي

وداع قيد التنفيذ
ـــــــــــــ

ما نفضْتـش
لسه تراب السكه
من جواك
والقلب بينهج ... مشاوير
لُقانا سَمار الأرض
ما لوش تفسير
أو
فهمِنا ع الأقد
إزاى يحضنها شوية ميّه
تطرح ورد
تضحك زرع
إسحب من جوايا لقلبك
أخر فرع
إرحل
عمر لُــقانا ما كان إيمان
علشان يبقى فراقنا خطيئه
ضد الشرع

اسمه انكسَّـــار... مريم النقادي الشاعرة مريومه

اسمه انكسَّـــار :
______________

اسمه إيه ؟؟
لمّا الروح جُـواك تنسّْكِبْ
وتجـف على أرض بُــور
مفيهاش خضار ..

إسمه إيه ؟؟
لما الحبيب يجرح
بالعَمد عينيك
ويبادلك السُّكر
مَــــرار ..

اسمه إيه ؟؟
لما الصَـديق
توفيه جمايل
وفـ وقت ضيق
يخلق ما بينك وبينه
ألف جدار ..

اسمه إيه ؟؟
لما اللى جنبك
عمره ما سألك
شايفـك بتضحَـك
وجُوه مِـنك
قايدَه نــار ..

اسمه إيه ؟؟
لما تحلم حِلم عادى
فرح عادى ..
ومَهما ف النجاح تـدادى
آخرة طريقك
انهيــــار ..

اسمه إيه ؟؟
لما تلقى الكِدبْ عـَـام
والضمير فى إنعِــدام
والضلال فى شكّْل قُط
وأنت ف تـُوب الحق ..
فار ..!!

عارف إسمه إيه
لما تكُـون للفرح بيـت
ووقتْ دمْعــك
مالكشِ دار ..
لما تتمنى تطلـع شمْس
وأنت فى عز النهار

أيوه ده اسمه ... انكسار !!

سؤال من شهيد لقاتل.... للشاعر: حسان اليمني

سؤال من شهيد لقاتل....
بقلم حسان اليمني

شهيد ورا شهيد....
والعدد بيزيد...
وإمتي تتوقف يا نزيف الدم......
وعصبة الشر إتجمعت علي قتلي...
واللي غدر بي...هو ابن العم.....
ويفيدك ايه....وانت شكلك شكلي...
والاصل واحد...والهم هو الهم....
غير انهم غيبوا عقلك.....
وخلوا قلبك حجر وأصم .....
بيني وبينك عدل وحساب جاي..
ورب شاهد...هو وحده الحكم...

لازم تكون كوكتيل.... قصيدة للشاعر: عمرو عفيفي

ساء الهبل ف الجبل
ساء العبط ف الزبط
والعقل لما اتهبل
بقى صاحبه آخر لبط
والمر مال ع العسل
والصح حضن الغلط
قاله تجيب بوسه
يا ستميت حوسة
الأية معكوسة...
واهو كله بالكوسة
الفالحة موكوسة
والخايبة محروسة
من عين تشق الظلط
.................
ان كان على الخيبة ..ف الخيبة بالجملة
وان كان على العيبة ..ف الناس ماهيش هاملة
سكك الهرب سهلة
ياعامل العملة
الحق ع النملة
وباقولها بصراحة
هى اللى دبت قوى
مامشيتش بالراحة
................
ياعين يا بصاصة..
إندبى يا رصاصة
بس ابعدى عنى
أنا أصلى مدلع
وسجارتى مصاصة
ورموشى واجعينى
وايديا إيد فافى
خايفة على كتافى
فاكرينها شغالة
قلتلها إهدى امال
دانا كتفى كتف عيال ...
مش كتف رجالة
بس النصيب يعنى...
شعرى بيوجعنى
والفرخة تفجعنى
لو جت على سهوة...
ف الحر باستهوا...
مش باشرب القهوة
باشرب حليب سادة...
والمية لو عادة...
تحرم على فمى
لازم تكون كوكتيل.....
علشان يروق دمى
....................

عمــــــــــرو عفيــفى

أنا نسيت إن أنا إنسان... قصيدة للشاعر : إيهاب وفا

انا انسان
بسيط جايز .. ضعيف يمكن ..
خيالى وغالبا سرحان
لكنى برغم تصويرك
بضفر حلمى بالمنطق
وبنزل وهمى بالامكان
وبربط كل شيئ عندى
بواعز من صدى الإيمان
عجوز تقدر تقول عنى
وفاتتنى السنين سرقه
قريت العمر كلة فى يوم
ولخصت الحياة فى ورقه
ولسه بحاول اتهجى
حروف الخوف ومدد الشوف
والوان الحداد فى العيد
ولسه بقول ياهادى ابدأ
لقيت وشى اتملي تجاعيد
فهمت من البيتين حاجة
أقول تاني من أول انا انسان
هقول تانى
انا تعبان
مريض جايز
مرهق قد اكون ممكن
عليل والانسولين بعتر فى دمى كلام
يجوز فارغ
حكيم بالغ عنان العقل
وشعر اهبل
تعالى احسبها م الاول
انا انسان
وكان حلمى بان الانسانية تكون
سما للكون سمه فى عيون
مهيش صفحة ف كتاب مكيا
ولا حلم ف ديوان شاعر
ولا لفته فى جمعية يتيم بالقصد
ولا برنامج انتخابات
لكرسى برجل فى الجنة
بتعرف تعمل الحنه
تعالى اعجن معايا الصبر
وحنيلى كفوف قلبي
صوابعى فلقت م القهر
بقالى سنين بحسس بيها ع الايام
وع الاحلام
وع الذكرى اللى عدت زى لمح الشوف
واطبطب بيها على قلب اللي حبيتها
بداية العمر أول طيف
أقولك بص بلاش حنة
معاك منديل !
أنشف بيه دموع جدى
ودم ابنى اللى سال ع الارض
فى الميادين ليالى العيد
فى التحرير وفى سينا
وفى المنصوره وفـ اسوان
وفى رابعة
هتنكر ان اللى مات ابنى !
خلاص يابا بلاش منديل
مفيش فى العين ولا دمعة
معاك شمعة
انور بيها على بكره اللى بيقول جاى
ومش لاقى تذكرة عوده
تعرفنيش مكان قرضه
أجوعها لمنسأة فرعون
تجيب م الدوحة للمغرب
ومتفوتش
يوووووه
انا نسيت ان انا انسان
وانى اغلى م الكعبه
وبساط الارض
وان اللى اتخلق من نور
سجدله وحب ملح الارض
وقال كل الانبيا حجاج
وقل كل الرسل اخوه
وقلب الامهات طارح
سنابل ورد على نخوه
وقال دمى عليكوا حرام
وكل اللى فهم فنان
ختاماً كل عام وانتم
كما انتم
بنى آدمين
وانا انسان

ثلاث قصائد للشاعر: أسامة البنا

راعــى الغنــم





قــولـى للـريــح تنتظــرنـى
أعــد غنمـاتــى . . واعلَّمهــا
واســميهــا بأســماء البــلاد
واقــرا تعــاويـذ الـرعــاه قبــل الميــلاد
واعــد زاد للــريــح
وقطَّــاع الطــريــق
تنتظــر أحفــظ مــلامــح كل ما ( ملكــت يـدايـا )
والســبايـا
وأســرَّح الـزوجــات علـى الأربــع جهــات
وانـى مطــرح ما تحطــى يا ريــح ح احــط
مـن زمــن قالــع ارادتـى حتــه حتــه
واللـى فاضــل منـى جتــه
عـارفــه إمتـى تبتـدى قصــص الغـرام
وامتـى تحـنيــط الأحبــه

صــدقــة للأمــوات





الشـمـس ما بتـزقـش باب لمَّـا بتخــش بيــوت
لكـن ما بتسـتأذنــش لمَّـا بتـدخـل . .
مـن خــرم الإبـره
ما بتقـدرش تصحينـى وانا واخـد تعســيلـة مـوت
ميــت بصحــيــح . . .
بــس مخــبى الـروح الـبردانــه تحـت مخــده
وحـارســها بـورده و ( أنـوبيــس )
كل نهــار بيعـدى بيســيب ف ســريـرى
عــلامـة وتـاريـخ اليــوم
و قصيــده ( لليلــى ) اتكســفت ما تقـولهــا ( لقيـس )
ميــت بصحــيــح . . .
لكـن باســمع خبــط المطــر الفـايـت صــدفـه
ع الشــباك
فايــت بيــوزع صــدقـه ورغيــف حــاف
ع الأمــوات

مســـخ






أنا تيـنــى . . تمــرى . . ســفرى ف المنفـى
باعــت ســحابـى يشــدنى ليمــه
ويطفَــى جمــرى ف المــرايات الغــريبــه

أنا يا الصحــاب . . .
يادوب إيـديـا ملمســه ع الشــرخ
بانفــخ تـراب المســخ
باســتوعــب حــدود الفــخ
أنا لســه يا أعــراب ...
مخبـى حتـى صــوتـى ف المنـديـل
طيـرى الأبـابيـل ..
انتفـاضــة الســهم الـوديــع

لأ مــش أنا ال بنهــج
دا كان صــوت ( البنفســج لمَّـا يبهــج )
لـو يشــوف عــدوده طـالــه
مـن شــبابيـك البيــوت

اعزمها على شاى... قصيدة للشاعر: محمود الحلواني

اعزمها على شاى
وسيب الشعر يضرب ضربته
يحـضّر الكراسى
ويجهز الرصيف
وينزّل الستاير القطيفه الحمرا
اللى من وراها دايما
تتسحب الموسيقى
وتربك الأماكن بالشجن

اعزمها على شاى
وسيب الشعر يضرب ضربته

قادر ينـّزل المطر
ويغسل الموانى بالشتا
ويحوّل الرصيف لعش أو
لقوقعه..
ويسوق عليها البحر تقبل دعوتك
وتسبقك ع العش

أكيد ، أكيد هتعرفه !
ماهو ده المكان [...]

احتمال... قصيدة للشاعر: عمرو عفيفي

احتمال
أبنى ف عيونك آمال
وافرد الحلم اللى مال
وابتدى أعبر حدودك
واهزم الصعب المحال
ءاحتمال
يعترف قلبى اللى دابك
ءانه عاشق نور شبابك
وانه مش طايل سحابك
بس متهنى ف رحابك
البعيد
بس أقرب م الخيال
ءاحتمال
نختلط وندوب ف روحنا
بس نفضل زى ماحنا
ننجرح .. نحضن سنينا
نطوى كل جراحنا بينا
حبه حبه ..سِنَّه سِنَّه
نكتشف ترياء جروحنا
تنفجر م العتمه طاقه
تحضن الجرح ب براءه
تنولد بينهم صداقه
طاهرة من غير أى ءانه
صافيه من غير افتعال
ءاحتمال
أبقى عاشق
تبقى عاشقه
أنسى كل الماضى فجأه
وابتسملك
واحدف الكلمه اللى عندى
بالعشم وبكل جرأه
تلقطيها ..تحضنيها
واما اقولك ع اللى فيها
تسكتى سكوت الموافقه
قلبى يضحك بانفعال
ءاحتمال
الشتا مايزورش بابنا
والدفا يحضن شبابنا
والربيع الأخضرانى
يطرح الحب ف ثوانى
يومها ما نحسش بآهه
لما نجنى ثمار تعبنا
تطرح الأحلام وراها
ضحكه خالصه من قلوبنا
طيبه زيك وزيى
نورها من ضيك وضيى
وان عطش غيطك لرىِّ
أروى بستانك بميِّ
واما نلقى الطرح نابنا
نقطف النرجس منابنا
يرجع الصيف اللى سابنا
والشتا مايروقله بال ءاحتمال
إحتمال

...................

(( عمرو عفيفى ))

بيرم شاعر الشعب... مجلة ابن عروس

شعراء العامية أول من رفض الهزيمة... مجلة ابن عروس

أغلفة أعداد مجلة ابن عروس

العدد الأول

العدد الثاني

العدد الثالث

بوح.. قصيدة للشاعر: سمير جلال البنا

عدت ليالي الأسي
شهق الفؤاد مجروح
لفح القلوب الشتا
نزع الدفا من الروح
فينك وفين ضمتك
قلبي مابطل نوح
حاسس ربيع خطوتك
جمبي منين مابروح
قلبي يموت إن سكت
لكن لمين هيبوح

***********

سمير جلال البنا

طب ماتطوّل... قصيدة للشاعر: محمد عباس علي

طب ماتطوّل

حبة زعل
على
كام احباط
وحسرة
م القلب
تسيّل
وتلاقى نفسك
هات
ياعياط
وتبقى
اكتر مالعيّل
مالك ياسيدى ؟
تقول :-
- بايعين
الغالى
وبسعر قليّل
خاينين
يابوى
مالهمش أمان
وحظى
وياهم ميل
وان قلت انسى
يقولوا حرام
صلة الرحم
فوق يامنيّل
طب اعمل ايه ؟؟؟
يسألنى
اقول :-
- أصبر عليهم
واتحمل
الغدر
مالأحباب مغفور
بشرط نرجع مالأول
وننسى قسوة ناس
قاسيين
فاكرينا
بنبيع اهالينا
يااخوانا
شاريين العشرة
شاريين ياناس
اللى شارينا
يقولى :-
- حاصبر
بس قليل
اضحك
واقول :- طب ماتطول !!

************

محمد عباس على

وشوارع... قصيدة للشاعر: معتز الطاهر

وشوارع
مرسومه بناس تشبهنى تمام
تدارى ف كل شروخ الحيط
وتنادى بحس غويط
وغريبه انها عارفنا بالاسم
والاغرب انها بتنادى بصوت مالوف
معروف
يشبه صوتى تمام
ايام اسمعها بتصرخ فبحس بخوف
وساعات القاها تغنى
وبرده بحس بخوف
وبشوف فى ضلوعها خدوش
منقوش على ايدها طلاسم
تشبه ترانيم الحزن
ف وقت مايجى وليد ويموت

******************

معتز الطاهر

عيل أنا في معبدك.. قصيدة للشاعر: أسامة الخياط

عيل أنا ف معبدك

...........
.............

وطاقة شوف
مابين حجرين
فى معبد الكرنك
طفل انطوائى اتولد
أنا كنت شاهد ع المخاض
عيل وتايه
مابين حجاره مصممه
على لحظه واحده للخلاص
وبين حلمه القديم انه ملك
عيل بيحلم بالخلاص
ونفوس بتحلم تمتلك
الادعيا
العاشقين
مش جوز
متحطنيش ياما فى خانة الاوليا
خماره كنت بضمها وتضمنى
كانت فى ساعة الشوف
ساحةأنبيا
صرخ الوليد يامايا فى ساعة الخلاص
مين اللى كفن جتتى بالادعيا
ملعون ياصوت
ملعون ياضوء
ملعون ياوقت الشوف
ملفوف بلهفة الاوليا
متحطنيش فى الحلم كما ولدك
انا من زمان اختارنى ما اختارك
انا من زمان
انا لحظه حره ف رمالك
شيلى من الايام
لو تقدرى
طلة اّمون
عيل أنا ف معبدك
ومش حاهون
حلمى أكون الملك
ومش حاكون
فحرمى حلمى مابين قدس اقداسك
ومش حكون انا غير
واحد فى حراسك
فضمينى وابكى معايا
وادعيلى ياما أكون
صفحه فى كراسك
مابين حجرين
فى معبد الكرنك
وبين دمعتين
مقهورين
يامّا ف عيون ناسك
عيل أنا ف معبدك
يامّا
أنا ناسك

********


أسامة الخياط

عود بخور.. للشاعر: مجدي السعيد

ع التسريحه منبّه مش شغال
فازة ورد بلاستيك زينه
نتيجة آخرها الأحد 2/8 "تمانية/اتنين"
فاكره الزفه واول صوره
جمعت بيننا احنا لتنين
لما شبكتي ديل فستانك
بالمشبك
واتقسم اتنين
بره الباب
المطر نازل خطوط
يخلي شبابيك البيوت
قضبان للعيون
وقفنا قدام المرايه
بصينا من كل الزوايا
البرد موتنا حنين
صور الزفاف طايرين
م الدرج
لشباك الأوضه
لفتحه جوا السور
قرص المرايه يدور
بصينا تاني في المرايه
ما عادش فاضل مننا غير
................ عود بخور