من ديوان شبه الحزن للشاعر| سعيد عبدالمقصود

يا غُنا يا دممممممممممم
سيما حتفتح فيلمها للناس
تهاود الكومبارس
تزقه ف بطوله
بغمزه من عينه
يفتح بلاد
وهبدْ ايدُه
ينهز له بحرين
يرجع التاريخ
اذا حس السيناريو
بيخون ف جماهيره
ويلغة من كتب المدرسه
نكسة (67)
ويعلن (25)يناير
عيد قومى (لشرف المحاولة)
ويكمل حروبه بكل مثاليه
بضربه من سيف
أو هبده من نبّوت
يضيف مشهد صامت
لجيوش الأعادى
وهما بيتمسحوا من ع الخريطه
ومشهد ختام
على ناصية العالم
وسط كل النجوم
والأوليا
والشُطار والعيارين
وصريخ الجماهير
وهوه بيستلم جايزة
(التمثيل المشرف)


من ديوانى شبه الحُزن الصادر عن دار الأدهم

سعيد عبد المقصود

من وحي صورة... للشاعر| أحمد موسى

عارف يا نسر ..
انا لو مكانك مش هطير
هحضُن بقوّه ومش هسيبها عشان بَغير
مصر ارتجال الأمنِيَاتْ , نبض ابتكار الأغنياتْ
سرّ اكتمال الرؤيَه ف عيون الضرير
مصر اللي زاهيه بفرشَها
وطريقها باهي بمشيَها
بخته اللي يملك عرشها , ويكون مُشيرْ
..

من وحي الصوره

كفايه عتاب في غربتنا.. للشاعرة| بسمة شعبان

وهاكتب لك كلام يمكن

ماتفهمهوش حواديتك

بطول الجرح فات عمرى

وانا بستنى يوم عيدك

واطبطب ع اللى راح منى

واطمنى

أكيد راجع فى يوم بكرة

أكيد هتلومه يوم ذكرى

مسيره يراجع الفرقة

يعاتب روحه م الحرقة

يدفى ضلوعه بضلوعى

ونتواعد مع الايام

مسيره ينام ويسمعنى

يدّمعنى

يرّجع لى الأمان مرة

فى طلة فجر

وطال الهجر فى سنينه

ولايمينِّى اللى لايمينه

ملامح أوضة ع الشاعر

ونور لأدانه فى الجامع

وكرسى جريد بيتمايل

يمرجح روحنا ع الأحلام

وإيدى فى شعره لما ينام

بتقراله فى سورة الفجر

وألف امام باطوف فيهم

وبادعى لربى يحميهم

واقول له يارب عدّلها

مسيره المايلة يعدلها

مسيره يحقق الأوهام

وتتعب روحى منى وانام

واخدنى فى حضنى بالقوة

واضم جروحى من جوه

واشد براحى م الدنيا

واغطينى فى صميم البوح

واشوفه بعيد بينده لى

ملامح قلب من أهلى

واعدي له فى بحور الصبر

واشوف الصعب بات سهلى

يانا ياللى الحاجات فيكِِ

بتطرح شوق مالوش معنى

بننده فى اللى ودّعنا

بنترحم على قلبين

صداهم شوك

بيوجعنا

كفاية عتاب فى غربتا

وخبينى فى حيطان بيتنا

ومدينى بسنين بتروح

وسميها افتعال فتنة

بحور الصبر صابها جمود

وقلبه اللى بِعد مفقود

عيونه اللى انتِ وعداهم

مابيوَّفوش فى يوم بوعود

الشاعر الكبير محمود الشاذلي يرثي المناضل الكبير أبو العز الحريري

توقف أبو العز الحريري عن العطاء مجددا لوطنه الغالي .. وحبة عينه مصر .. وفقراء مصر من العمال والفلاحين .. توقف ولكنه لن يرحل عنا سيبقى أبدا بنضاله وكفاحه وشجاعته النادرة مثالا لشباب مصر .. لم يكتم في حياته قولة حق .. ولم يكف يوما أن يواجه السلطة والحكام المستبدين الخونة ولم تفلح أساليب الحصار والتعذيب والسجن والتشهير به كذبا وزورا وبهتانا عن خوض المعارك تلو المعارك في وجه الظلم الأسود .. نوره الساطع بأفعال نضاله الجسور سيظل بدرا ينير سماء مصر .. كن مطمئنا يا أبو العز يا رفيق النضال .. سائرون على دربك .. نحن وأبناؤك وشبابنا الصلب من أجل مصر وفقراء مصر .

...........................

وكما كتبت وقلت في ديوان رصال الكلام .. في قصيدة " غاب اللي كان " يوم استشهاد المناضل الشاعر زكي مراد ..
أقولها يوم رحيلك عنا جسدا وبقاءك رمزا مضيئا لأبناء مصر :

كل يوم الموت بيزْفُرْ ألْف آهَه ..
من تدابيره العَجَبْ ،
كل يوم الموت بيُرْقُص ع العَتَبْ ؛
رَقْصِةِ الطـِير الدبيح
لما اتْرَشَقْ في القلب سِكِّين الغَضَبْ
وحَطَّمِ الشعب المسيح ..
كُل صُلْبانُه الخَشَبْ
هُوََّا ده الموت الكسيح
وانت اللي سابق كل موت
يا بو عمر ضاع مِنَّا انْسَرَقْ
هوا ده الموت الضرير
وانت اللي صورْتَكْ في العيون ..
شُعْلِةْ عَرَقْ ؛
تِفْرِشْ ضِياها ع الطريق .
هوا ده الموت الغريق ؛
اللي خَدْ مِنَّا الجسد
لَكِنِّ روحَك يا رَفيق ؛ بِنْتِ الحياه
كل يوم تِوْلِدْ لِمَصْر الْمُشْمِسَه ؛
مليون رَفيق !!.

نافخ البوق... الشاعر محمد مجدي

يمكن اكون
صدقت احلام المدينة الفاضلة
شفت اتساع شكل الوطن
من غير حدود تفصل ما بينا
واختصرت العاصمة ف وردة
يولى الناس ايمانهم
شطر اوراقها
العبير بسحب من القلب الضغينة
ونرتشف حلم التزاوج
بين تعاليم الاله والمؤمنين
إنا جعلناكم شعوباَ
كى تدوبوا ف اختلافكم
ترسموا وش الطبيعة البكر
أجمل من جنان الخلد
يهتز السؤال الجوهرى
من كل اسراب الملايكة
لخالق الاراضين
_ ازاى هاتخلق فيها من يفسد جمالها
ويستبيح طهر التراب
بالدم
قلبى المبتلى بالهم
لم يفهم .. مرادهم لما قالوا
واحنا بنسبح بحمدك
ربما حسيت كمالى
لما قال الرب ليهم
يسجدوا
ف ازاى نمر لقبة السموات
عرايا من الخجل
راح تنحنى كل الرؤوس
إن لم تكون الارض أحلام الملايكة
يسكنوها خالدين
أو يفرشوا الضى الالهى من جناحهم
تحت رجل الصاعدين
ويوزعوا الجنات.
،،،،،،،،،،،،،،،
ــــــــــــــــ
ـــــــــــــــــ
ــــــــــــــــــــــــ

نافخ البوق
محمد مجدى

دَسْتور ياهللة ياصـاحب البــيــت.. للشاعر/ محمد أحمد خفاجي

...........دَسْتور ياهللة ياصـاحب البــيــت ...........
...........سرقوا الطومبيل وأديني مشـيت............
..........من حـــــــارة لشارع لـــحـــواري............
..........من قلب الدنيا خلاص أنـــــا جيت............
..........أتــــحــدى كــــــل الـــحــرامـية.............
..........قالوا شالوا رئيس أنا قمت صحيت............
..........أتاريه كـــــان حلم الغـــجـــريـــة............
..........قمت اتخضيت تـــهــت وملـــيت.............
..........ودماغي صبـحت مـــــلـــويــــة..............
..........دَسْتور ياهلله يـاكــــل بــــــلاد..............
.........سرقوا الطومبيل سـجــنوا الأولاد.............
.........منـــعـــوا الـكهربا منـــعــوا المية.............
.........دَسْتور على كــــــــــل الحرامية..............
...........دَسْتور ياهللة ياصـاحب البــيــت ...........
...........سرقوا الطومبيل وأديني مشـيت............
..........أتــــحــدى كــــــل الـــحــرامـية.............
.

........


محمد أحمد خفاجي

الهوان... قصيدة للزعيم الهلالي

الهوان
*************

كتر الهم
نساني البكا
ومشيت ورا الأحلام
اغني
لا دمعتي
ف الحزن بتوا سي
ولا ضحكتي
ف الفرح بتهني.

************
كل الكلام بايخ
وريحته شياط
واللي أتبدل ف الحكم
دلس علينا وزاط
نفس المواني
يا بر بتزورك
تحرق مراكبك
وتعلي محظورك
وانت اللي شايف
قصورهم
بتذل في جدورك
مسكين لمين البكا
لو كان ف مقدورك

***************
مشغول برمل الرصيف
يرمح ف قلبي الشتا
ويحني ايدي الخريف
يشمت في لوني العدا
وانا البعيد القريب
من انين قلبك
سامعك بكل المعاني
وبوعد ك تاني
نعبرخطوط الصبر
وبهمتك تاني

***********
حني كفوفك
باللي فات م القهر
في حلوقنا طعم الاسي
حنضل وصبر ومر
كلام بيخطف قلبي
من صمته
ويعدي فوق السكك
شايل جروح غلبه.

************
الورد هجر الجناين
دبلان ورا الاسوار
علاء ودومه سنابل
كلها اصرار
بيحوشو منها البكا
للشاهدين اصرار
في السجن سور متسع
لمعامل الثوار
اما البراح
للغواني
ويزينوه أشباح
...........

محمد مصطفي الهلالي

جوابي اليتيم... من تنهيدات الشاعر/ صلاح يوسف

(جوابي اليتيم)

..........

بضي النور
وبكتب له جواب يامه
حروف احساسي من نورك
وورقه البوسه والضمه
وغصن اخضر
دا مظروفي
عليه الصحبه واللمه
بلون النيل وبكتب له
جواب يامه
*********
وقلت له يامحبوبي
تعاللنا
بسبحة قلبك الطاهر
تنور لينا ايامنا
وتبدر فينا احكامك
وتحصد بينا احلامنا
دا اسلامنا
وايمنا
نور بيشع لوجدنا
تعالي انزع الحمي
بضي النور
وبكتب له جواب يامه
*************
ولما انام
تيجيني عينيه
تقولي اصحي ماتنامشي
انا هامشي
وفايت ليك كتاكيتي
وبعد الولد مايهونشي
اوعي الوصل مايدومشي
اصرخ لاء استني
يقولي لاء انا هامشي
واقوم مفزوع واتعوذ
من ابليس
ومن كوابيسه الرمه
بضي النور
وبكتب له جواب يامه
*****************
وانتي كنتي دعياله
اتاري الدنيا وعياله
وحالفه تيتم عياله
وهما دولي راس ماله
واسلامه وايمانه
شايلهم فوق علي راس التاريخ عمه
بضى النور
وبكتب له جواب يامه
*************
وفاكره يامه يوم سفره
وحكمه قالها من حكمه
تحاسب م الزمن حفره
ومفهمتشليها معني
وايه القصد من حذره
وعدت ساعه ساحبه ايام
وبعد شهور
وكان قدره
جاني خبره
بواحد جاب لي من أطره
لفافه سودا واداني
ساعتها لقيت صدي الحكمه
رنين بيشد ف وداني
يقول ادي حفره من حفره
مصدقتش
اكيد دي من الزمن خمه
جريت يامه
وطاير ساق الهمه
وصرخة رعد من حوه
بكل العنف والقوه
تقول لاءه
دا مش هوه
واقول يارب الهمني
من الصبر ومن القوه
ياريتني اكون انا هوه
بحرقة شوقي بتلههف
وفوقي جنوني بترفرف
تشعلل ناري القايده
مفيش فايده
كأني ف حلم جوايا
بضربه حطمت قلبي
وألمي كان سند ضهري
ودمع الجمع فاحت بحر ريح بحري
وصوت المدنه بيدووي
وناس علي روحه بتصلي
وغيرهم بره مستني
لقيت القبر متحني
وبعد الدخله خيت ف حضنك اترمه
لقيت عيال هنا بتبكي
ناسيه تقول اكل ممه
وراح يامه
ولسه جوابي ف ايديه
أهوه يا امه
أهوه يا امه
...............

(تنهيدات صلاح يوسف)

حلم الغلابه رغيف.. للشاعر/ محمد حميدة

حلم الغلابة مش رغيف
...............

يا عتمة الليل الطويل
أنا قلبي زي الفلاحين
بيكونوا عز الضلمة نور
عارفين طريقهم والسكك
تحت القدم بتكون صديق
بتبشبش الطوبة إن تكون
تحت القدم راح تستقيم
يا عتمة الليل الحزين
دمع الحيطان متسرسبة فوق الرصيف
فإزاي ينام إبن الشوارع ع الحيطان
وإزاي يكون حلم الغلابة
مش رغيف
مش شئ مخيف
إن الظلام في الليل يطول حبتين
ما العتمة في بطون العيال أغمق كتير

وما فيش نهار بيخشها
غير ضي مخنوق في الرغيف
وما فيش فرح بيخشها
ولا حتى زيف

لمّا بطّل فجأة...... للشاعر/ أسامة منيسي

فلاح بمنجل وشجرة توت
واقفة بثبات
عامل بترس
شال حب وطنه
جوه ف قلبه
من سكات
مبطلش يحلم
ولما بطل فجأة
مات

لما كنا صغيرين.. للشاعر/ عمرو عفيفي

لما كنا صغيرين
كنا نسمع عن رجال
عن بطوله
عن نضال
عن سجون وعن اعتقال
بس ابو العز الحريرى
كان لنا أكبر مثال
كنا نسمع ياما قصة شنطته
اللى مافارقتش إيده
شنطة كانت حاضنه حلمه
لقمة المصرى الحلال
من إيديه الشقيانين
لما كنا صغيرين
...............
إندهولها الست زينب واضحكولها
جوزها فى الجنه ياعالم
إفرحولها
واسألوا هند اللى شافت
أو حكولها
عن حياته
عن شقاه
عن مرار ظلمه اللى كان مفطوم معاه
وانت ياهشام يابن ضهره
قول ل هيثم ينسى قهره
أرض ابوكوا كات شقا
انما أرض اللقا
جنه مفروشه ل لقاه
آاااااااااااه ياابو العز بصحيح...
جنتك لو يوم نطولها.....
حلم عيشنا بنحلمه طول السنين
لما كنا صغيرين
....................
...................

(( عمـــــــــــــرو عفيـــــــــــــفى ))