إزاي كده ؟! ..........أشرف الشافعى

هو انتي ليه للدرجة ديْ
مِآمنة جداً ،
بالتخصص ف العناد
ومرشَّقة حكايتنا بمطبات قلقْ
أمشير بقى بيستهيف الزعابيب !!
بعد اما شافك مرة بتزومي
بقى نفسه يحضرلِك حقيقي ،
أي كورسات ف الجنون
بينك وبين الفرح تار بايت
وساعات باشُكْ ..
بإنه صورّلِك قتيل
إزاي كده ؟!
قادرة تصوني العِشْرَة ويا الحُزن
وازاى ف ثانية بتقدري
ببراعة تتحسدي عليها تحوِّلي ،
وِسعْ الوجـود ..
لخُرم إبرة ،
بيتخنقْ فيه الحنين والفضفضة ؟!
باحييي فيكي موهبةْ ،
تجميل بشاعة قسوتك
ببساطة ،
وانتي مغمضة !

طرح البحر............ناجى شعيب

((...وشوشته عنك يا حبيبتى كتير
وقسمت سرى ردنى للنير
لسا الودع حرنان
لساه ما أنش الاوان
ينبش بأيدة رملتك للطير))

الرمل شهقة موجه حرانه
بنزل حكايتى وابتدى عومى
وحكايتى جوف حامى
متكومه ع الرمل
ازاى اسيبك وانت عطشانه
تبقى حكاية م الودع وقعت

حمره عيون الرحلة على بدنى
فكى رباط الصره عن كفنى
يخرج خلاص البحر يطعمنى
يسقينى ف القيلة
يخبى على شربى
تطرح قطوف عنبى
أبدر عيالى نجوم
على توبك البمبى


لسا الودع بيجمع الحواديت
وبيجدل المستور ضفيرة بنت بعشقها
يرسم لها الداير على العمدان
ويقيد لها الكردان ف سدر الليل تبات
لسا الودع ببيعجن الحنه
لسا عمود الفجر مستنى
لما يهلوا البنات
ويغنوا غنوة شاشك المنقوش


((دم العروسة
احمر من الحنه
من فرحته نطر على العمة
دم العروسةاحمر من الجرجوب
من فرحته نطر على المركوب ))


وشوشتى بسرك ما أبوحة لحد
والبحر طارح لؤلؤة ف سدرك
جرجرتنى ع الرمل والمالح
هزتنى ما اتهزيت
عرتينى ما اتعريت
قريت كتابك بكيت

مين اللى بعتر رملتى ف عنيك
عكر حليب البحر من حواليك
والبحر مليان بالصبايا الزين
دور فى قلب البحر عن اترك
ما تنمش من غير حجابك
ما تترميش م الحضن يا مخاوى
وما تحتميش باللى يقولهولك
كل البنات المفطومين ع القمر
مش محتاجين للضى . !!

يوليو 1988

عيال الطين.......محمد حميدة

في بلدنا الناس
بتصحي الصبح من النجمة
وتشد خيوط الشمس سحاب
بيوزع نوره لخلق الله
في بلدنا الله
بيحن علينا ف أول ضي
ويوزع فرحه على البيبان
وعيال الطين
كما طرح الارض
اشكال وألوان
وأهي نفس الارض بتطرح شوك
وبتطرح ورد
واهو لسه الصبح بيطرح نور لقلوب الكل
في بلدنا الناس غير كل الخلق