انتي بقيتي مسخره
والعهر علم طرف توبك
لما اصبح مفخره
عماله بتشقي العيال
وتدبحيهم
انتي برضه حبيلتي فيهم
توهتي بيهم
دا انتي مش عارفه السنادي
مين ابوهم
مين اللي شرعي ف شرعك انتي ياهل تري
اللي بارك فرشتك تلاتين سنه
ولا اللي باعك للجماعه
وعامل الدين منظره
ولا اللي بيحاولوا يبوسوكي
قطعوكي
وانتي ملكه
وده أميرك
كلهم ناموا ف سريرك
من يوميها الدنيا صبحت مجزره
والدم سال
والناس في توها بين حرام وبين حلال
والهم كله جمع مال
لمي اللي باقي من العيال
لسه فيكي ولاد حلال
دا الكل عاملك قنطره
**********
وما تقوليش بتأكليني
وانتي شايفه السم جوه قلب قلبي
وف عجيني
لما بتخبي النجاسه ف ضهر ديني
طب وديني
عمر انا ما كنت تابع
من بعيد افضل اتابع
زي شجر التوت علي جسر السناطي
زي نخله لم تطاطي
قلبي ضله بيحمي وردك ف الخريف
صنفي عيالك وقولي
مين استباح جسمك ودمك
مين عفيف
مين اللي نفسه ف حته من لقمه ف رغيف
جسمه بايت ع الرصيف
مين اللي بيغير في دينك
السفيه
هو الكفيف
معجون بجاحه ومقدره
*********
فوقي بقي وانوي الطهاره
عفري وشك ترابك
اندمي
ابكي بمراره
لجل ربك
يمحي ذنبك
ومتقنطيش من رحمته
ربي واسع مغفره.....
********
(تنهيدات صلاح يوسف)
أزال المؤلف هذا التعليق.
ردحذفالرائع صلاح يوسف .. شاعر متميز بلا شك نسعد بابداعاته و نتهافت عليها نتعلم منها و نقتبس من افكارها .. شاعر واسع الافق سديد الفكر ... تحياتى العظيمة له و كم انا سعيد و محظوظ ايضا انه صديقى ... تمنياتى له و للجميع بالتوفيق .... وليد مليجى
ردحذفدائما متألق مااروعك الي الامام دائما تقبل مروري
ردحذف