(كلام نظرى )
.................
مد روحي
حالف ليسحب
شوق عيونك للعميق
فنشوف طريق
حاجب خطاوي الزمن
عن طلة ميعاد اللقا
ويعذب رجولي
إن تمشي ألف ميل
متكتفه
فمفيش دليل
إن القصيده مزيفه
ومفيش مفر
غير إني اظبط ساعتي
بلون عيونك
وأقنع حقيقتي
بالسراب
يمكن تتوه المعاني في السطور
وتتمرد علي صمت الجمل
فاحلف لأكون كداااااب
واحبس لساني
وقت ما يهب الشوق عليا
واقتل عيوني
بكام رصاصه م اللي فيا
ما أنا شايف بس خيال
الموت مش قادر
بيفلفص من رمش عنيكي
اللي بيطعن حوادتنا
ولا قادره الأحلام
تتوينا م الشمس
اللي بتفضح حكايتنا
ولا لون الميه
مش قادر يبقى حقيقه
فنقرب نلقى سراب
ف غياب
ف عتاب
وسؤال مش لاقى جواب
أنا ليه
مش واقف
في مهب عيونك
تخطفني
فبرغم الشوف
مش قادره عيونك
تلمح في الحيره
على اد الخوف
العزف بيترجرج
وبتهرب صوابعنا جوا كفوف
وموسيقى الناي الكداب
بتلبس قلبي مصايب
ف برغم غيابك
وغيابي
مثبوت إن ما كنتش غايب
و برغم الوقت المحتار
لساها الساعه بلون تفاصيلك
هرسم مواويلك
وهسيبك تختار أغنيتي
زي ما هختار إن اغنيلك
........................
#عبدالفتاح_فليفل
