أنا إبن هذا الجيل
اللي مالوهشي دليل
بيميله ساعه يمين
وشمال ساعات بيميل
أنا إبن هذا العصر
على عمري بيقامر
أنا إبن لصلاح نصر
ولعبحكيم ٠٠عامر
إبن لهزيمة بلد
كسرت صميم روحه
من يوم ماقلبي اتولد
بيتاجروا بجروحه
أنا إبن حلم ومال
قالوا عليه سحري
جانا اللي بعد جمال
وفتحها ع البحري
أنا إبن ثورة عيش
في بداية السبعين
في دوله ماتراعيش
وتحابي للملاعين
أنا إبن ٦ اكتوبر
ولعشره من رمضان
قلنا هانوصل بر
ونعيش بقى في أمان
بدت الحيتان تسمن
وشيلت انا الشيله
صبح الرئيس مؤمن
وكمان كبير عيله
أنا إبن صُلح مهين
ضيع حقوق الدم
ومن امتي كانلي كوهين
خال ... في يوم أو عم
أنا إبن شهر حزين
عصروا البلاد فيه عصر
يوم دخلوا الزنازين
كل اللي قال يامصر
أنا إبن يوم العرض
قاعد على منصه
سال الدما ع الأرض
وبفعل لأبالسه
وجه في غفلة زمن
واحد من الحراس
ماعرفشي دفع التمن ؟
أو جه على أي أساس
أنا إبن تلاتين سنه
مش قادر اوصفها
كسرت جميع مااتبني
وقلعوا ارصفها
أنا إبن عهد هباب
أنا إبن عصر خبيث
انا ابن للإرهاب
ومحاولة التوريث
أنا إبن في المفترق
وماقداموش شاره
أنا إبن قطر احترق
وغريق في عباره
أنا إبن عصر حبيب
وعاصرت كرباجه
أنا إبن فجر كئيب
ماحلمتش احتاجه
أنا إبن ثورة شعب
قامت بدون انذار
زرعت تقاوي الرعب
في دولة الفجار
واتهد سور ورا سور
واتشالت اللزقه
كسرت صنم مكسور
كان منتظر زقه
أنا إبن هذا التاريخ
في لعبة المصلحه
سابوا الميدان بيشيخ
والشهدا في المشرحه
وكله راح في طريق
ولمكسبه إختار
رفيق قتله رفيق
وبقى مابينهم تار
أنا إبن هذا الزمن
اللي ماشفلوش وش
أنا اللي بادفع تمن
والكدابين بتقش
أنا إبن حلق حوش
ابن التلات ورقات
وملايكه طلعوا وحوش
أكلونا ع الطرقات
أنا إبن مجلس حرب
جانا وصدقناه
شبعوا قفانا ضرب
وشبعنا قولة آه
أنا إبن حلم وضاع
في زحمة الدروايش
أنا إبن شاري وباع
حلمه برغيف العيش
أنا إبن هذا الجيل
متغير المسارات
أنا إبن هم تقيل
أنا إبن الانكسارات
٠٠٠٠٠
ليست هناك تعليقات:
إرسال تعليق