قسم وسمعنا
الموال
أول ما نبدى القول نصلى ع النبى المختار
ونقول كلام معقول للكل مهمن صار
نحكى حاجات بالأصول تسمعها بالأبصار
يا سامع االشعر قول قسٍم على المعنى
حكاية كان زمانها فات لكن لسه نهايتها ما جاتش
حكاية كان صاحبها مات وأهل المغنى قالوا ما ماتش
ولو كل الكلام حكايات ما كانش يصيب عقولنا النتش
يا سامع الشعر قول ما تخافش قسِم وسمعنا
الود ودَك تسمع الحواديت الود ودَك تنفلت منِى
تتسحب الكلمة تتفرفط الفتافيت سكر على المغنى بلسم على الننِى
محشور كلام فى الحلق م الضرب بالنبابيت سامعينه كل الخلق الإنسى والجنى
يا سامع الشعر أرجوك طمنى وإسمع ونفعنا
الغنوة
قسم وسمعنا من كل حى ودار
الصحبة تجمعنا والليل لازمله نهار
أنا صوتى من بغداد بحر على تونس
مالقاش وطن فى بلاد عشش فى حوت يونس
يا شمس من بابل سيل الرماح وابل
وأنا ودى نتقابل والكل يسمعنا
قسم وسمعنا من كل حى ودار
الصحبة تجمعنا والليل لازمله نهار
أنا نفسى يوم أرتاح م السكة والمسافات
يسكن عينيا صباح يفرش على الأزمات
ليه صوتى متدارى وأنا غنايا البوح
ده أنا نفسى يا نهارى تكون سفينة نوح
قسم وسمعنا من كل حى ودار
الصحبة تجمعنا والليل لازمله نهار
********
محمد النويهى
1997
