المبادئ العشرة للديكتاتور
(1)
لازم تدوس بجزمتك
على اي حد فـ سكَتك
على أي بذرة للأمل
بيها البشر متعلقه
(2)
قفل طاقات النور
بروز شهايد زور
وزع أراضي بور
وازرع عقول مصدَقه
(3)
ولع نيران الظلم
إحرق خيوط العلم
إقطع حبال الحلم
ثبت في حبل المشنقه
(4)
إفتل فتن للشعب من دقنه
إلهيه بشئون الغير عن شانه
لو مات شهيد يبقى حلال دفنه
لو عاش يعيش مطحون في قلب المحرقه
(5)
لو مره فك الشعب أوتاده
إقطع غموسه وميته وزاده
لازم يحس ان احنا أسياده
واحنا الهوا واحنا الدوا والمعلقه
(6)
إطلع وقول كام كلمه في السهره
واطلق عليهم شلة السحره
بوشوش خبيثه وضحكه م الصفره
دي شعوب تدوب في الكلمه لو متزوقه
(7)
أمَن رجالك زي تأمينك
وازرع مابينهم منَهم عينك
إشرح وخاف لو قالوا فاهمينك
صيد الطيور أمتع كتير م الزقزقه
(8)
إعمل خصومك ديب وخوفهم
واعمل همومك طوق وكتَفهم
إسرق في قوتهم ثم حلفهم
يعيشوا دود ولا يطلعوش م الشرنقه
(9)
كل الشباب اعداء لمشروعك
لكن العتاقي كويسين ، طوعك
وقت الطوفان بيعلوا في قلوعك
في الانتقام سندان وهما المطرقه
(10)
إعمل قانون يخدم في محاسيبك
يسجن في كل اللي كشف عيبك
إطلق سراح اللي ملا جيبك
واحبس بلد خلف فى خلاف متفرقه .
..................
لــــــــ تامر شاكر
