الحزن مقبرة السنين
============
إوعاك تقف عند الأنين
و لا يوم يكتفك الحنين
خد من تجاربك عبرة و إجرى
الحزن مقبرة السنين
و اللى يخوض بحر الحياة
عمره ما يغرق فى الدموع
و اللى يدوق طعم النجاة
عمره ما يحلم بالرجوع
ما يطيقش تكبيل الإيدين
إوعاك تقف عند الأنين
***
إوعاك تسيب
حزنك يلِوِّن دنيتك
و لا ريح سَمومه يوم
تطفى شمعتك
إوعاك تخاف
ده الخوف وَهَنْ
إفتح لأملك طاقة
فى جدار محنتك
و بحرقتك
ولَّع شموع بكرة
اللى نور شمسه
أكيد من شمعتك
و امسح عنيك
إوعاك تشوف الخَلْق
مرة دمعِتَك
فارق تلال الهم
لو ع الدم
فجَّر أزمتك
إنحرها قوم ف الفَجْر
سَيِّل دمَّها كالنهر
جفف دمعتك
دى الدنيا ليك ...
كِفاياك أنين
دا الحُزن مقبرة السنين
خَطِّى المحن صارع
خللى الألم دافع
و لو الصعاب واجْهِتك
خللى الأمل وِجْهِتك
عن سكتك دافع
كفاياك أنين
دا الحزن مقبرة السنين
******
طارق العمرى
ليست هناك تعليقات:
إرسال تعليق