قصيدتى فى رثاء الشهيدة "ميادة أشرف".. إهداء إلى العزيز الغالى الزميل الصحفى أيمن الشريف.
.............
مفتتح:
هتعيشى يا ضحكة ميادة .. وتدومي يابسمة كل شهيد
---------- القصيدة-----------
لسّاكى على ناصية شارع عبدالخالق ثروت
بتهزّى الارض برجليكى
تِقرى ف مزامير الثورة
شايفك
بتخبّى ضفايرك
ف حزام الكاميرا الجلدى القاسى
بيطوّق مُهرة حِلم جموح
وف شنطة إيدك
عبيتى هموم الناس
مسطوره
بالحبر الأزرق
مستنى الدور يتدسّك
ياخد تأشيرة: جاهز للنشر
وف كل المرّات:
- مرفوض
- موضوعك ناقص
-مش مدعوم بالصور الحية
من أرض الواقع
.........
قررتى تثورى
واتشعلقتى بموجة الزحف البشرى فجاتكلك طلقه
والتانيه..
فاضلك واحده وتبقى شهيده
سلّمتى الروح.. وارتحتى
وفى لحظه
مرّت زي شريط الفيديو عليكى:
كلمات "المتنبى"
و"شهاوى" و"لوركا"
- فاتنشرت مقالاتك
- علشانها اتحجزت كل مطابع مصر
- واحتلت صورتك
مانشيتات الصفحه الرئيسيه
واترسمت ضحكة مياده
ع الحيط الشرقى جنب حسينى وعاصم وحبيبه
ليست هناك تعليقات:
إرسال تعليق