الصعاليك
________
_إيه اللي جابك هنا؟
كان صوت هشام*
قبر مقفول ع الحقيقة
تأويل جديد للحزن من غير انفعال
واجابة لسؤال منتهاش
هي الحقيقة الموت لوحده
والليل على القهوة
ولا فـ قصيدة لسه متكتبتش؟
_الصمت كان باقي الاجابة_
ونظرة لليل بإحتقار.
أسيبه واسرح جوه دخان المعسل
تفاصيل كتير بتتمسح م الذكريات
شكولاته كنت جبتها لإسراء من كام سنة
و اكلتها اول ما جُعت
إحساسي بيها شيطان وحيد ..بطّل غوايه
مقدرش يوصل للملايكة
ولا حتى يبقى م البشر
إيه اللي جوّه عنيها ينفع يكون مضمون
عنيها باب مقفول
معرفش مين واقف وراه؟!
ضحكتها تشبه للمجاز
بتخبّي إصرارها العجيب ع الجرح
وتسيب حكاية جديدة أحكيها لنور*
يضحك عليها
يقطع ضحكته فـ النُص
يسرح ف نُص إزازة مشربهاش،
مزيكا هادية وحلم مرمي ويّا عمره
جوّه قلب البحر
ويقولي: يامجنون
البنت مش محتاجة شاعر
البنت محتاجة لودان تصدّق كدبها.
يضحك وليد*
يكشف سنان أكلها مصروف العيال والبُن
و قصيدة عن فاطمة اللي لسّه
مزروعة جوّه خَضَار عنيه
و ذكريات من الطفولة
قبل ما قلبه وايده يشقّقوا .
حسام حسين لسّه مجاش
عمّال يلف ف الشوارع
ويخبّي تفاصيلها القديمة ف قلبه
يقفل عليها عنيه
ييجي يشاركنا الموت على القهوة
ويقولي أنتَ واد ملعون
كلنا ملاعين
الشعر ده جاحدقوي
قتل كتير
___________________.
*هشام دياب
*نور الدين الشريف
*وليد المصري
الصعاليك
ليست هناك تعليقات:
إرسال تعليق