الثورة أغنية
**************
ياكل سرقةاتسرقت
والبلد نايمه
ياكل فرصةاتحرقت
م الكبار عامدين
ياكل دقةادَّقت
من عقول شايبه
على راس عيال رفضت
يقعدوا ساكتين
يا كل كلمة اتكتمت
ف الحلوق لما
رفضت تقول للغيلان
يا عنيكم الحلوين
يا كل دمعة اتحبست
في العيون ثم
نزلت كما الطوفان
ف القعدة منفردين
يا كل أم اتقهرت
على ابن جاي قتيل
يا كل صرخة اتصرخت
من حشا الرافضين
يا كل لطمة اتلطمت
في ساعة التغسيل
يا كل كوشة اتهدمت
واتحولت تأبين
يا كل هجمة اتصدت
على طرْف م التحرير
يا كل ركعة اتركعت
ع الأرض ف الميادين
يا كل طلقة انضربت
بالقصد والتدبير
لقتل ناس هتفت
في وش ناس فاجرين
يا كل طوبة اتحدفت
على حد م الثوار
يا كل عين اتصفت
برصاصة الخاينين
يا كل بنت اتسحلت
واتشمت الأشرار
يا كل جثة اتفرمت
على ايد بشر غادرين
يا كل صحبة اتفضت
واتفرق الأصحاب
يا كل لمة اتلمت
واتجمع التايهين
يا كل اخت اتخضت
على أخ لما اتصاب
يا كل دعوه اتلبت
م فم ناس طاهرين
يا كل أضحية
على مذبح الطاغوت
يا كل أمنية
صنعولها ألف تابوت
الثورة مش هاتموت
الثورة أغنية
غنتها ف الملكوت
أرواح شباب طاهرين
يا كل هذا وذاك
يا كل أب وأم
الثورة مش كارهاك
الثورة كارهه الظلم
**********
أشرف عمر مقلد
ليست هناك تعليقات:
إرسال تعليق