من أشعار الكبير بيرم التونسي

عتاب
بيرم التونسي

************

ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى ونا اللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟

بنت... للشاعرة: شيماء محمد

بنت

ولساها ..
بتستنى كلام الحب ف أشعاره
وبتصدق ..
بأنه كان بيقصدها
بيغزل كلمته توبها
وانه فارس الأحلام
بكره أكيد هيخطفها
شايل بكره ع كفه
بريئه البنت بتحبه !!
ورغم الزحمة ف الأحلام
مهياش عايره شوار الحلم
ولا إمضا على بكره
ولا شباك يشوف النيل
بتحلم ..
بس لو تحضن رضاه / وتنام
متعرفش
بان الواد ولا عاد يحب ولا يكره !
ولا مكدب كلام الناس ولا مصدق !
وان الليل
على صدره بينزف ليل
صحيح قلبه مليه النور
لكن مهجور في ليل صمته
وحلم كبير مينفعش يكون حلمه
عشان الواد ..
عشق نفسه
عشق فارس من الحواديت
يخاف الخوف على كفه
برئ الواد ميعرفش هوس حلمه
ولا يعرف ..
جروح الشمس ف مدينته
وان الشمس
حتى الشمس
محتاجه شوار النور

***************

بقلم/شيماء محمد

هبدأ اعيش... للشاعر: علاء جمال

هبدأ أعيش

فى قلب المدينة
بعيد عن مارينا
وكل المداين بتاعت ولاد الابالسة الكبار
هعلق على ضهري يافطة كبيرة
وهكتب عليها ( مجرد حمار )
بيحلم ببكره وشمسه اللى طالعة
مجرد حقيقة تشق النهار
تنور قلوب الحواري العطاشي
لحبة حقيقة فى ظل الحصار
فى ظل السكوت اللى كاتم نفسنا
وصمت العيون اللى بيداي عار
حبيبتي بحبك وحبك معلم
ف قلبي لاني مجرد حمار
فى قلب المدينة بيحلم ببكرة
وبكره اللى طالع تملي انتظار
تملي بنحلم
وعمر التملي وعمر التمني
ماحقق فى مرة اى انتصار
فى قلب المدينة
دموع العجايز
ودم الغلابة معبي ف ازايز
تقولي بتحلم هقولك ده جايز
ولكن بحلمك هتفضل عبيط
ياصاحبي المواطن
د حلمك بليد فـ خدلك نصيحة
وخد يافطة مني وعلق عليها
قوام الشعار ( مجرد حمار )
فى قلب المدينة
بيحلم ببكرة
ويستني بعده
وبعد اللى بعده
وايامنا جايه مليها الغبار
حبيبتي بحبك وحبك معلم
فـ قلبي لأني مجرد مجرد
وآخر كلامي هقولك يا صاحبي
بأني بصراحة بموت مش بـ أعيش
لأن البلد دي بيحكمها دايما
جناب الفريق او سعادة الشاويش
وشلة عفانة خدوها بخيانة
ومزة وازازة ونفسين حشيش
فـ لازم اجرب اكون مرة راجل
ياإما الكرامة ياإما الشهادة
وخلي البيادة لعبد البيادة
ولو مرة صادفت رصاصة صابتني
هقولها بشجاعة بأني ساعتها
هبدأ اعيش .............
فـ بطل تقولي بأن احنا اخوة
وان اللى بينا مجرد خلاف
لأن اللى بينك وبيني مقارنة
مابين الزنا وبين العفاف

********


علاء جمال

أنا المسئول... قصيدة للشاعر: أشرف عمر مقلد

أنا مسئول
قاعد علطول
على الكرسي
و نفسي يا رب
عمري يطول
أعيش 100 عام
و كله تمام
دا لا بانجو و لا برشام
و لا بودره وحبوب اوهام
دا شكل الكرسي كل صباح
يرد الروح
و سيرة الهم ويا الغم عنده تروح
أنا دايماً على استعداد
أقول الله وأكون درويش
واعمل ذكر لأجل يعيش
لقب مسئول
انا عالم وعلماني
ديمقراطي واخواني
و ليبرالي في وجداني
واربي دقني واتسلفن
واحلقها واتكجول
واقول للماضي يا معفن
وغير رأيي واتحول
ولا آخد لقب سابق
انا معرفش غير إني أكون مسئول
يقولوا عني إني فلول
أنا راضي
يقولوا ماضيَا مش مجهول
وأنا ماضي
مع المأمول
انا خفة ودمي خفيف
جداري عريض
بلا تصنيف
واعيش في الدنيا كالمهطول
أو المهبول
وأحيا حياتي في اطمئنان
وأنا مسئول
وابيع العرض والهمة
و كل رجولتي والذمة
واكون مشنوق
واكون شانق
ولا اسمع لقب سابق
يقولوا عليَ اني فلول
وايه يعني
يقولوا عليَ مش مقبول
ولا يهيني
ما دام الكرسي من تحتي ومش معزول
أنا راضي وكلِّي قبول
دا كل الدنيا دي تخفى
و لا يخفى
لقب مسئول

شعر فى شعر.... قصيدة جديدة للشاعر... سعدنى السلامونى

اموت واعرف

مين اللى مهربك

فى وشوش الجدران

اموت واعرف

مين اللى غطاك بالسما

ورمى على ضهرك البيوت والغيطان

اموت واعرف

مين اللى سكنك عيون الانسان

دا الكون المتغطى بيك عريان

قوم ياشعر ادخل الشعر

حاتفضل لحد امتى هربان

................................................

مش داخل

ومالكش دعوة بيه

الناس بتحبنى وتموت فيه

واول ما بتحط اسمك على

يشلونى ويمرونى فى الشارع

شيل اسمك من فوقيه

....................................

اسمى

اسمى مين

قوم ياشعر ادخل الشعر

دانت شوية صور على ايقاعات

على قفيتين

صدقت نفسك ولا ايه

مش عارف انت مين

وانا مين

لا

ارجع تانى

ادخل بروحك اليمين

..................................................

مش داخل

مش داخل

وانا عارف انا مين

انا الشعر

لا داخل قصايد ولا دواوين

انا الموسيقى والخيال

السما والارض والجبال

لا

الاراضين

انا الروايات

والقصص والحكايات

نثرى مين

وتفعيلى مين

وعمودى مين

انا التاريخ والحاضر

والمستقبل وكل المخلوقات

اللى راحوا واللى جاين

.............................................

دا كلام مجانين

قوم ياشعر ادخل الشعر

وكفاية خبلان

ان كنت الكون

انا الاكوان

وان كنت الاكوان

انا الانسان

وانت حتة من الزمان

قوم ياشعر ادخل القصيدة

قوم ياجبان

......................................................

قوم

شلنى من نفسى وروحى

وافرشنى على السطور

الدنيا بقت سجن

كل سور وراه مليون سور

الضلمة بتقتل فى النور

افرشنى فى عالم الورق

عالم النور

............................................

مش داخل

مش داخل

وماتفضلش تزغد فيه

لو سمحت

شيل اسمك دا كمان من فوقية

اسمك بقى خطر

بقى تحت الكاميرات

كاميرات الاشباح البشرية

الاشباح

اللى بتدير الكرة الارضية

كل يوم يموتوا فيه

ويدخلونى النشر الميت

يخفونى من عيون الانسانية

عايزنى ادخل الشعر

شيل اسمك من فوقيه

.................................

اشباح مين وكاميرات مين

اقسم

ادفنكم جميعا فى سطرين

واخلص عليك ياشعر بالشعر

شعر ما تعرف جالى منين

شعر يصحى الذئاب فى الورق

ويطلقهم بنى ادمين

قوم ياشعر ادحل الشعر

وانا حاقوم اريح ساعتين

***********

سعدنى السلامونى

أنادي لك... للشاعر: محمد عباس علي

وقلت
الليلة اعدى لك
أمد الخطوة
اتحرك
لباب الجنة
واجى لك
أقول لك
يامه
واحشانى
واحشنى الحضن
والدعوات
ولمسة ايدك الدافية
وترتيلك
وكلمة ( ياابنى ) واحشانى
ونفسى
اسمعها من تانى
واعود من تانى
فرخ حمام
حياته وروحه فى هديلك
وينده من بعيد الصوت
( محمد )
انتبه
واسمع
واقول لو بعد موتك موت
حيفضل جوا قلبى يقين
بانك عايشه ويايا
فى قلبى
ف روحى
فى الوجدان
حيفضل يامه جوايا
تمللى ايمان
بانك ليه ضلايه
وشط امان
ولما اتعب من الضلمه
ينور ليلى قنديلك
وكل ماشوقى بياخدنى
بكل الحب اعدى لك
امد الخطوة
واتحرك
لباب الجنه
واتبسمل
وانادى لك

************

محمد عباس علي

كل يوم... للشاعر: طارق العمري

كل يوم بيزيد بشوفتك لهفى ليكى
و الطريق اللي إترسم ف بحور عنيكى
قد ما بيهدينى بيتوهنى تاني
و الكﻻم فى حروفه بتضيع المعاني
و أبقى شايفك و العنين هاتموت عليكى
..
الوصال وياكى ما بيطفيش حنين
و الحنين بيكحل الشوق فى العنين
و العنين شايفاكى بحر من البراح
و البراح و ﻻ مرة بيساعى الحنين
بس قربك زى فرحة للحزين
عمرها ما بتكتمل غير بين إديكى
كل يوم بيزيد بشوفتك لهفى ليكى
..
أصعب الحرمان من الحاجة ف وجودها
تقطف إنت الشوك و غيرك
ييجى يتهنى بورودها
تبقي قدامك و نفسك
مرة حتى تمس عودها .. تبوس خدودها
و الدوافع كلها بتقولك إنت
مد إيدك يوم و خدها
حطم السور القزاز .. كسر قيودها
و إنت صايبانى بسهام من نور عنيكى
كل يوم بيزيد بشوفتك لهفي ليكى
؛؛؛
ده كﻻم بجد و إنت عارفة

******************
طارق العمري

في سوق النخاسة..... للشاعر: وليد فؤاد

في سوق النخاسة

مَنَابِر بتسقَط في إيد الدَّمار
فِ سوقْ النِّخَاسَة
معابر بتقْفِل في وِشْ العَمَار
فِ سوقْ النِّخَاسَة
مقابر جَمَاعية .. للأحرار
فِ.. سوقْ النِّخَاسَة

بداية الحكاية في دَولة وكَيان
دي كان ليها شنه ورنَّة وأذان
وهدّوا المَنَابر
وسدّوا المَعَابر
حفروا المَقَابر
ودفنوا الأمان

في سوق النخاسة تشوف النجاسة
ومُجن البغايا ورسم الخطيئة
وبيع الضماير وطَمس الحقيقة
وقتل الملايكة الضَّعيفة البريئة
ودسّ الدَّسايس ولِعب الدَّنيئة
وقامت حريقه ..!!!
وطفّوا الحريقة
وحرقوها تاني
بنفس الطريقة
ونَصَبوا نفسْ المَحْكَمة
ومنحوا بَعضْ الأوسمة
وطمسوا كُلْ الأنظمة
ضَمَاير فَقيرة ..!!
وعامية البصيرة
بتقفل بيبانها في وش العشيرة
وتِحرَق رفاقها فِ نُص المسيرة
وتقتل رموزها بنفس الوتيرة

دي كانت لكُل الخلايق عَلاَمة
بتتجلى روحها في سِبحة وعِمامة
وتيجي سيرتها تلاقي ابتسامة
ووجهتها كانت مكان الإمامة
وراحت عليها ..!
وسابِت إيديها
ونِشْفِت بحورها
وضاقت بجورها
وغِرقِت بنورها ف بُحور النَّدامة

ويوم القيامة ..!!
معاد الحساب
هاييجي الجواب
وتاخُد حقوقها وتحضن بشوقها
وترجع دماها وتجري ف عروقها
حياة الخلود .. ما فيها جُحُود
فيها العدل وحدهُ
أكيد راح يسود