مجنونة يا قوطة
ومجنون كل اللى بياكل
ولا بيغمسش
ملعونة اللقمة اللى بتنزل
مصارين البطن وتتمايل
من غير النفس
مهزومة الدنيا فى خطاوينا
موجوعة الشدة فى أيامنا
محروم النبض من العالم
على طول يضّارب يتلائم
على طول الكل بيتحارب
على أى حصاد
وصاحبنا الغلبان مش لاقى
ولا فتفوتة
مجنونة يا قوطة
مركبنا حمامة تشُق المىَ وتتمايل
ولا تسّاهل
ولا تعرف إيه هتساوى فى يوم
من سوق البحر وتستاهل
وشراعنا حامينا مغطينا
ومعدينا لهاليب الريح
والدنيا بتتطوح بينا
وتخلينا الكل جريح
دفتنا فاتتنا وفارقتنا
جريت لبعيد مش مظبوطة
وسابتنا نحارب فٌرقتنا
وحاجات جوَانا مكبوتة
ونحاول نصرخ نلقاها
تتوجع بس على هواها
والنجا فى القارب والقارب
إتفتفت زى البسكوتة
مجنونة يا قوطة
أسعار النار هتروح النار
والعبرة هترجع ع التجار
والقوطة هترخص موت يا حمار
طالع واكل نازل واكل
زى المنشار
برسيمة النيمة كونيمة
كده يا بهيمة
بتحشى ودايما مبسوطة
مجنونة يا قوطة
*************
محمد النويهى
هايل
ردحذفهايل
ردحذف