اسقي البنات يا مطر ، و هيطرحوا اللولي ..
لتموت حاجات يا مطر ، و يعجّز الخولي ..
يا جنايني - لازماً تعود - يا جنايني - تِسقي الورود - يا جنايني ، و تِرمي ضِحكَك - مع التقاوي - تُحُصد غَناوي - يا جنايني ..
يا عُقد فُلّي - يا ورد قولّي - أنا ليه تملّي - عطشان غُنايا ؟ !!
و ليه الجنايني - كُلّ أمّا أغَنّي - بيسِّد عَنّي - مَيّ القَناية ؟ !!
و ليه القناية بتبُخ نُوح ؟
و ليه غُنايا مافيهش روح ؟
و ليه حبيبتي - ماتسقينيش ؟ !!
و ليه هموت ؟
طب ليه بعيش ؟
و ليه السما مخلوقة فوق ؟
و ليه الأراضي حديد .. و طوق ؟ !
طب إمتى يلمحنا الشروق ، و نهارنا يطلع - يا جنايني !!
يا جنايني - إدّي البنات - يا جنايني - سُكّر نبات - يا جنايني ، و إدّي العيال فَرْح و مراجيح ...
للدنيا باب ، و الباب مقفول - وحياة ولادك - يا جنايني - هات المفاتيح .
ليست هناك تعليقات:
إرسال تعليق