(رايح لفين ؟)
لساك بريء عازب !؟
لساك تملس ع البوار يخضر !؟
لساك تدردب في شروش الأرض روح !؟
لساك تداوى الجروح وتلم شراقيها !؟
لساك تسيل مدبوح و الجبين عرقان !؟
لسه الأمل بين الشطوط غرقان !؟
تعرفشي توب الخضار
ع الأرض رايح فين ؟
تعرفشي ليه الزرع خرسانه ؟
تعرفشي ليه جدر الشجر أساسات ؟
تعرفشي ليه الضله بالعماويد ؟
فين ثورتك ع الشطوط بالطمي!!
خامل و نازع من قلبك الفيضان !
نايم في مجرى بليد و ف وشك التجاعيد
محني و شطوطك مزروعه بالأسمنت
أمنت انك إله مغصوب علي الترحال
بتشوف و تسمع
محروم ما لكش لسان
معروض علي صفحتك كل الذنوب ألوان
راحت عكارة ميتك بالطمي
راقد قتيل متعطن الجته
و مافيكش حته تشبه البراويز
فاكر زمان خطوتك في العروق سكر
فاكر نخيل البر و الصفصاف
فاكر نوي المشمش بيرشحك م الزير
و الكوز عسل منك يتوصف ترياق
أصبحت فينا الداء و بنستحي منك
ليصوروك ميت قتيل و معدش ليك فيضه
و انت اللي واهب الحياه للشطوط جنه
لو كنت تستني
و تلم رجلك ع الحدود رايح لفين
سكة ندامه و شوم خطوتك توجع
ارجع بلاش تسحبك رجليك
أشرف تغور في البيرات وتجف
أشرف تلف تعاود الكره
الهجره مره
فبلاش.. يتقل مقدارك
دارك .. قرارك ترفض التطبيع
بلاش تكون سلعه تتعرض للبيع
بلاش تكون فلاشه للجرابيع
بيع
كل العروض و بلاش تكون مملوك
خليك إله و تقبل القرابين
بين الحياه و الموت تبتدي خطوه
و انت اللي ناوي تنتحر بإديك
****************
الشاعر
أبو الخيربدر
ليست هناك تعليقات:
إرسال تعليق