سكوت
..........
سكوت
الله يلعن أبوك ياسكوت
يابنتى عينك بتحكى صمتنا العاجز
أعدى حاجز ألاقى 300 حاجز
عينك بتحكى يابنتى
معنى لحظة موت
..........
يالسانى إنطق بقى
قوم حرر الكلمة
إيه بعدها المشنقة
لو ماتت الكلمة
إنطق ياتخرس وتكتم
كل همسه وصوت
الله يلعن أبوك ياسكوت
..........
عينك يابنتى بتقنص قلبى برصاصة
أدارى منك إيه وانت إللى كاشفانى
الموت فى عينك حياه
وأنا من حيا عينك
ميت بموت تانى
..........
يارافعه كل الجباه
طاطيت أنا راسى
بكتب مابين نظرتك
ونا راسى منداسه
..........
عينك يابنتى بتقنص قلبى برصاصة
ياننى عين بابا سجنانى فى عيونك
ياحرة وسط العبيد
انا إللى مسجونك
يابنت وسط الرجال
ب 300 راجل
ياقلبى لو فيه حبيب
الباقى بيخونك
..........
شريان حياتك أنا ؟؟
دانتى إللى شريانى
رخصت أنا دمك
وبعزة شاريانى
ياليلى كنت الحبيب
أصبحت أنا الجانى
ياحرة وسط العبيد
أنا إللى مسجونك
..........
عادل التونى
ليست هناك تعليقات:
إرسال تعليق