أصفر X أسود
ــــــــ
الأسود
ده لون شعرك على كتفى ، وأنا ف حضنِك
وكلمة حب من قلبِك ..
تقوينى .
وتنصرنى على نفسى
ـ برغم الكسرة ف عيونى ..
قصاد حلمِك ـ .
الاصفر
ده لون وشّى وأنا عيان
ومش قادر أروح شغلى
وعينِك تبتسم بالكدب
تواسينى .
لكن جوعِك
وخوفِك م اللى جاى بكرة ..
ما يتخبوش على عيونى .
الاسود
ده لون ليلى اللى مايقدهوش نجف بيتِك
ـ ف هجرِك ليا انا وهو ـ
وف بعادِك بيجمعنا ..
شعور بالإنتماء ليكى .
الاصفر
ده لون ضحكة قرايبى ف دفنتى لأمى .
وأنا بكتم ف حزنى وبافتح التربة
ألاقيهم بيتقاسموا ..
بتآمروا ..
على ورثى .
الأسود
ده قلب أمِك
ف عز المحنة بتقولِك :
" سيبيه
مفيش فايدة ومالوش قومة ..
باقيلك إيه ؟! "
ـــــــــــــــــــــــ
حياتى اتلونت فجأة بلون الكره
لأيام المرار بعدك .
وداخل فيها لون الحزن
على حرمانى من حضنك .
بآخر عافيتى بجرى .. ورا ضلِك
لمحتك من بعيد بتوقفى التاكسى
ندهت وبس كان نفسى ..
أشوف عينِك ، ولو نظرة وداع منِك .
لكن لما قفلتى الباب على ﭽيبتِك
فضل ديلها يشاور لى
كأنه كان بيوعدنى
بإنِك راجعة من تانى .
************
أمير مصطفى
مايو 2010
ليست هناك تعليقات:
إرسال تعليق