انا ليكى (مسعد كشك)
*****
عشقت عيونك النايمه ف ليل صحوى
وشدو امواجك الراسيه على شطوطى
وضحكه بالرضا تطرح سنابل مايله على عودى
عشقتك وانتى بالكلمه ف ساعه حب بتجودى
عشقتك فى بنات الحى
غزاله شارده ف الوادى
انا ليكى انا ليكى
ومش عارف اذا كنتى صحيح ليه
انا ليكى
وتطرحلك سنابل عودى حنيه
هاقوللك ايه
واعيدلك ايه
تجيش نقعد ف ضل التوته نتذكر
تقوليلى كما الماضى
كلامك لاحلى م السكر
تغنينى على لسانك
على حجرك انام واسكر
واشوف الماضى من بكره
وساعه الضهر نتغدى رغيف اسمر
وملحايه وعود خضره
ونعمل شاى على الراكيه
اقوم م الترعه اتوضى
ع صدرك كات مشاء الله
وف رقبتك ريال فضه
كانت امى زمان شيلاه
يجيب الحظ ويخفف الم خضه
ولما يرن خلخالك يدق القلب ع الخطوه
اخاف من بكره ليجينى شايل كفنى
ونبقى حكايه كات ماضى
ساعتها البسمه ماتشوفنى
ولا بغيرك هاكون راضى
ولا الضحكه تطاوع قلبى ف غيابك
لكن لامتى ياروح قلبى هابات سهران
على بابك اناجى الفجر ف طلوعه
يكون لى من لقاكى نصيب
يودى القلب ف غرامك كتير ويجيب
جروح الناس لها ساعه
وانا جرحى الامه تغيب
ماتشفى يوم ولا بتطيب
ف احزانك ف معزوفه حزينه تقولها الحانك
نفسى تحضن شمسك ضلايه
غيومى تحبل الدنيا
وتولد يومى تقابلينى
لقاكى ليه كالترياق
لقلب ف بعده كان مسموم
ترد الروح مع الاشواق
وتتبدل هنا بهموم
يرفرف قلبى م الفرحه
كفرحه عيده بعد الصوم
على دا الحال يكون حالى
امد الاه تكون مرسال
واغنيلك مواويلى
واكتب لك على ضى القمر غنوه
تغنيها بترتيلك على قبرى
اذا كان الفراق ليه آخر صبرى
***************
مسعد كشك
ليست هناك تعليقات:
إرسال تعليق