أراجوز متأرجز بالأراجيز
وبتاع أطفال وكمان عواجيز
وشباب بين الإتنين واقف
فى شوارع وحوارى ودهاليز
بتمرجح فى الدنيا بكيفى
وبقول من ناتج تخاريفى
والفول هو حبيبى وصاحبى
وإن جاز القول يبقى وليفى
أراجوز إنما لاسع خالص
بتشقلب وأضحك وأتمايص
وساعات بيكون الحزن كتير
على طول ع السما بفضل باصص
أدعيله وأقول أراجوز غلبان
وده مش معقول أفضل تعبان
طب مين هيضحك مخاليقك
إشفينى ولو كان عندى جنان
بيحبنى ربى ويعطينى
ومحبة خلقه بيدينى
والكل بيستنى ميعادى
والحكام بيطلعوا دينى
قال إيه بأتضاحك بكلامهم
وأتندر على ديل خدامهم
وبخاف وبكش وأقول معلش
علشان ينسونى فى إعدامهم
ينسونى ويمكن ما يسيبونيش
لا أتنطط ولا أغنى ولا أعيش
علشان بتمألس بوعودهم
وبقول دا كلام والفعل مفيش
مش برضه بخاف وبقول الحق
وبقول للظالم دايما لأ
والسر فى زرى وطرطورى
وكلام الناس عنى إن أنا بق
************
محمد النويهى
8/1/2013
ليست هناك تعليقات:
إرسال تعليق