البراءة للجميع
للي قتِّل واللي سهِّل واللي طبل ف الاذاعه
للي هرَّب واللي خرَّب واللي سرَّب كام اشاعه
للي عذِّب واللي هلِّب واللي سبِّب للمجاعه
للي طبَّع واللي لمَّع واللي شجَّع ع الصياعه
البراءة للجميع
للي قال ع الناس بهايم أو عجول عاوزين رضاعه
و اللي شاف الناس غنايم ملك أهله والجماعه
و اللي بـ اسم ابوه بينهب ف المزارع والزراعه
و اللي بـ اسم البيه تخَرَّب ف العقول أو ف المناعه
البراءة للجميع
للي غيَّر ف الاراده واللي زوَّرها بـَّ بشاعه
واللي زيط للبياده واللي كان ليهم صناعه
واللي فاد واستفاد واللي بوظ ف البضاعه
واللي عاش فاسد حياته والفساد كان ليه شفاعه
البراءة للجميع
للي سب الدين لأهله واللي باع الدين بياعه
للي حرَّض كل مره اللي خلعوا ع الخلاعه
للي حب الخيبه دايما واللي عودنا المياعه
واللي شجَّع واللي طمَّع واللي سمَّع ف النطاعه
البراءة للجميع
بس تيجي ع اللي ثاروا والمحاكمة تبقى ساعه
تتجمع فيها الأدله ............ والادانة بالإشاعه
واللي يحكم قاضي عسكر...لا عدالة ولا براعه
تبقى دية مش براءة
دي إدانه للجميع
ليست هناك تعليقات:
إرسال تعليق