مكالمه ع الهوا
ـــــــــــــــ
* الوه إذاعه
ــ معاك يافندم ع الهوا
إسمك وسنِك والمؤهل والغرض م الإتصال
* معاك وحيد دبلوم زراعه عاطل وعندى خمس عيال
والسِن يعلم ربنا معرفش يا سيادة اللوا
ــ صادق يا حاج
إتفضل إحكى شكوتِك
* النور فـ عينى بينطفى
وتعبت من كُتر السكات
وشبعت ذُل ومطوحه
ومراتى جالها جلطتين
ــ بس انا مش دكتور يا حاج وانت ومراتك تعبانين
إحنا هنا مخصوص عشان المفقودين
* عارف يافندم بس إنتوا برضوا المسؤلين
ــ تقصد ايه؟
* إبنى يا بيه بقاله فتره مختفى
لفيت عليه فـ المستشفيات
ورُحت مره المشرحه
وشوفت صورتُه من يومين فـ النشره ويا المجرمين
وهدومُه دايبه مقطعه
ــ والتُهمه ايه؟
* بيقولوا عدا قصاد كمين رافع صوابعُه الأربعه
ــ إرهابى يعنى
* إرهابى ايه
طب قول يا بيه إشتبهوا فيه
ــ إشتبهوا مين الأمر واضح
إبنك دا اخوان مسلمين ودا فعل فاضح
يستاهل انه يعدموه
* انا ابنى طالع زى ابوه
عمرُه ما كان على وضع ثاير
انا ابنى مره قال لأخوه
الظلم يبلع100يناير
و انت يابيه أمرك عجيب حَكَمت وانت متعرفوش
ــ إسمع ياحاج بلاش تعيب وتقول كلام انا ماقبلوش
انا قُلتلك انا مش طبيب
وعلـ عموم إدينى اسمُه أسأل عليه
وإبقى إتصل بيا وتابع
* الإسم حنا وحيد نجيب
عيل من العجز اللى فيه
كفُه
اليمين
بـ اربع
صوابع
****************************
من ديوان(انا م البلاد التى) عن دار نشر يسطرون
عبدالتواب محمد
—
ليست هناك تعليقات:
إرسال تعليق