قصيدة بعنوان :تحويلة
شعر /محمدصبحي نصر
لأرواح 67 طفل في عمر الزهور الذين دهسهم القطار
وهم في طريقهم للمدرسة بصعيد مصر
::::::::::::::::::::::::::::::
إنفد بموتك بره قضبان الحياة
وإغزل سكوتك في النحيب
إستحضر الأحياء وهن..
الحلم مفتول بالشجن ..
والقصة موت..
من فوق قضيب المهزلة ..
م المزلقان اللي اتبرى ..
واللي ارتوى.. بدماء كتير م الأبريا
مكتوب على كف القدر ..
واهبين ولادنا للحياة ..
فيمر قطر العمر يحصدهم بشر
تحويلة الموت البطيء
قصدي السريع .. ولا المباغت للحياة
كسرت بقسوة حلمنا وراحت بعيد
بمناسبة العيد السعيد ..
ومنين نجيب الفرحة من قلب السواد
يا قسوتك يادي الزمن ..
هنعيبه تاني ؟! مش كفاية اللي احنا فيه ؟
ما كفاية راح حلم الولاد ..
تاه من زمن
عطشان يا قطر الغلبانين ..
بدماء حبايبك ترتوي؟!
يا منطوي حضنك سراب
والحاضر اللي اتمنيناه ..
في لحظة غاب
بس الحكاية طويلة لسه
وأكيد هييجي يوم حساب
جاي الحساب
أشكر الصديق والكاتب الرائع والشاعر الثائر سعيد شحاته حييت أخي على زوقك خالص تقديري أبو مهند المصري
ردحذف