.jpg)
جاء إلى القاهرة من قرية نادر مركز الشهداء محافظة المنوفية، تعلم القراءة والكتابة فى سن السابعة والعشرين، كان يعمل نجار سواقى في قريته وإلى الآن مازال يحمل في جنبات صدره محبة خاصة لحياة الريف البسيطة
صدر له
رغاوى الالم
تصبح على خير
عضم خفيف
اول شارع شمال " مختارات شعرية"
وديعة فى البنك
انتر نت
دواوين فى الدرج
ارواح بتطير..رواية شعرية
جنون رسمي
بنج زيادة
كما أسس مجلة الرصيف
قدمه إلى الساحة الأديب العالمى نجيب محفوظ حين صرح للجرائد ان لا خوف على شعر العامية فى مصر مادام سعدنى السلامونى موجودا
تم ترجمة دواوينه الى عدة لغات "الانجليزية- الالمانية- الفرنسية" حتى اختارتة المانيا فى موسوعتها الشهرة ضمن اهم الشعراء فى الوطن العربى مع صلاح عبد الصبور امل دنقل احمد عبد المعطى حجازى عبد المنعم رمضان
والان يتم تدريس بعض دواوينه بالجامعة الامريكية
نختار إحدى قصائده وهي قصيدة احترم نفسك ولها قصة طويلة في الباص القادم من القاهرة الجديدة إلى وسط البلد... القصيدة ستشرح موقفها
احترم نفسك………………..
الكلمة طالعة من بقها
زى صاروخ منشن على روحى
الكلمة وجعتنى
وجع مش زى وجع جروحى
وجع من نوع خاص
انطلقت من بقها فى لفة الميكروباص
احترم نفسسسسسك………….
هى قاعدة جنبى وانا قاعد جنبها
فى حالى
جايز بتقولها لحد تانى
انا مالى
لفيت بوشى ابص بعييييييييد
لقتها بصى لى
احترم نفسك………………..
الغضب
ناطط من عنيها عامل سخونية
غضبها مغرق جسمى كله
الغضب مطلع صهد
الصهد طالع على شاشة عنيه
كل ما اجى ابص هناك اللاقيها بصى لى
احترم نفسك……………………………
الكلمة جمرة نار جوايه
مولعة فى حشايه
انط من شباك العربية
قبل ماانط لازم ابص ورايه
ورايه
ولازم عربية تكون جايه
بينها وبين عربيتنا
خمس خطوات أو مترين
عربية نقل بمقطورة
تكون جايه على سرعة متين
عجلها يدوس على دماغى
يخليه حتيتين
وساعتها
الكلمة حاتنزل ع الأرض حروف
بس انا قاعد على الكورسى مزنوق فى اتنين
هى فى جنبى
وراجل عجوز على رجليه طفليتين
حانط ازاى وفين
0000000000000000000
ماالم الكلمة من جوايه
واجمعها وارميهلها فى وشها
أردها
خد نفس جامد
كمان كمان
كمان
كمان
كمان
بص فى عنيها
قول لها
اهجم فى لحظة ضعفها
اهجم اهجم على طول
خايف ليه
حانزل اسكر لها
تسكر لمين
دى ذبونة زيك زيها
ردهالها ياد
ردها
نفس الكلمة بالظبط
خليها تغلى زيك
تتشال ع الكورسى وتتحط
لا لا لا لا
انا حانط من العربية وخلاص
لازم انط
مافيش حل تانى
ادينى فى العربية
والعربية طايرة بينا على الاسفلت
بس مافيش عربيات جايه ورانا
احترم نفسك………………….
هى قالت الكلمة دى ليه
إيه اللى خانقها من الدنيا
ومخنوقه بيه
جايز يكون حبيبها سابها
إيه يعنى
بكره يرجع ليها تانى
يتكلموا فى الشقة والدبليتين
هى حاتطلب عصير فى عصير
وهو حايطلب شاى
ويفضلوا بالساعات قاعدين
الساعة تعدى فى دقيقتين
هى تبكى
الدمع يسقط على ضهر إيديه
ترفع عنيها لفوق
تثبتها فى عنيه
هو يبكى
تمد إيديها تحضن إيديه
هو كل شويه صوابعه تحسس فى جيوبه
علشان يعرف صرف قد إيه وباقى قد إيه
وحايحاسب منين
هى تقوله باحبك
هو يقول لها بجنون
وكل شويه عنيه مرعوبة من الجرسون
هى تقوله انت بتبص على إيه
احترم نفسك…………………….
الكلمة زى التعبان
بتقرص جوايه
هى قالتهالى ليه
جايز تكون رجلى وانا بالمها
لمست رجلها
أنا ساعات بانسى نفسى
ألاقى رجلى سابت جسمى
وراحت لرجل تانيه
واحنا قاعدين عى الكورسى
والاقيهم متصاحبين
وساعات ألاقيها حاضنة فى رجل والرجل حاضنة فيها بالساعتين
أسيبها مع الرجل وانزل أمشى
احترم نفسك…………………………..
هى قالت الكلمة دى ليه
ازاى طلعت ببساطة من بقها
ردهلها ياد ردها
قول لها
احترمى نفسك انت
قول لها
حاخد رقم العربية واشتيكيها فى المرور
تشتكى مين ياجبان
دى ذبونة زيك زيها
ويمكن أرجل منك
قالتها لك فى وشك
بجراءة وعنف وتحدى
وانت عملت حجتك السواق
كل شوية تقوله يااسطى هدى
والحقيقة
انت بتتمنى العربية تتقلب بيكم من ع الكوبرى
بس خايف
والعربية بتلف بيكم فى الهوا
والناس بتصرخ جواها
أطفال بتسقط م الشبابيك
هى حا تستنجد بيك
تحضن فيك
وفجأة تبص فى عينيك
تلاقيك انت
فتقولك
احترم نفسك
قصيدة تحفة من شاعر أكثر منراااااائع خالص تحياتي
ردحذف