محمد خالد الشرقاوي
..........
عيل لسه ...
يا دوب بيتهجي حروف الكلمه
و أما بيلمح طرف عنيه :-
البنت الشايله الشنطه بتضحك
للواد الواقف ف الشباك
كان ديماً بيفهم :-
سر اللمعان ف العين
عيل لسه !!
بيسرح شعره علي الجنب
و ف قلبه الحلم يزيد نمو
نفسه يكبر:-
خمسه بمقاس الإيدين
ف يلاقي نظره " يحسها "
- يسهر علي النغم الرقيق
- سكران و من خمر الكلام
- يرسم الصوره ف خياله
- يهمس كلمه برقه تعدها
و اما تغلي النشوه فيهم
يشّبِكوا الأتنين أيديهم
وبخفه يجروا ف ساحه خضرا
ينده القمر البعيد
بسرعه ينزل الكادر
يرقصوا جواه (( سلو ))
و العندليب سهران معاهم
- ((- و القمر خدنا القمر
لجزيره ابعد م الخيال
لا شافتها عين
ولا جات ف بال -))-
و يعيش هيام العاشقين
وقت الفراق
يبعت القمر مرسال
بكلام يزغزغ ف المشاعر
يا ....... اللي ما أعرفكيش !!؟
مرفق طيه
صوره ليكي
رسمها قلبي
من ذاكره السمع
- يا أيُها الصوت الذي
حدثني ..
علي مضدٍ
ف المنام -
أحلف :-
بكل " أها "
ف (( سيره حب )) ثومه
- أني دايب …
زي باقي العاشقين -
و حياه ساعات الفكر فيكي
وقت انقطاع الكهربا
- طال الغياب -
و جوه قلبي
100 صوره ليكي
و علي الجدار الخارجي
- القلب ....
- و السهم اللي خارمه م الجهتين
- و حروف اسمي المربوطه
- وعلامه أستفهام ف أخر السهم
" متضايقه "
و باصه ف ساعه الأنتظار
و حياه السته ف الميه
اللي ما تعبتوش مذاكره
- و القرأن علي عنيا
- و المسيح الحي
أحلف بأيه و تصدقيني
-- طال الغياب --
و بدون ما أعرف
حتي شكلك
و الله بحبك .
ليست هناك تعليقات:
إرسال تعليق