من إمتى الأعمى بيوّلف على الألوان؟
ومن إمتى الوهّج فى اللون
بيستريّح
فى نظره الأعمى؟
شئ طبيعى
ماتشوفش أبتهاجى
بطوق الورد اللى لافف على مشربيه روحى
وشئ طبيعى
القله مابتلمعش فى عيونك
وتحسها فارغه
وناشفه ع الفخار
وشئ طبيعى ورد روحى
بيكتر
وبينبت
ويخرج عن طوع جنينتى للشارع
يلطش عبيره خد بنت
يترمى على جلابيه ساده
يتبحتر عبير
ودوشه موسيقى
يغرّق فى حضن بنوره أزاز
شئ طبيعى
ماتشوفنيش...عميان
وشئ طبيعى
أعمى القلب
مابيشربش مايّه
وشئ طبيعى جدا
غرورى الشخصى
والمستفز للعميان
بإنى رسول فنان
مهمتى الأصليه ع الأرض
أرمى رسالتى
ورد
وأغانى
وعناقيد عنب
وعصافير
وكوبيات شاى بنعناع
لأمه......
بتقى شرها
بمزيد من الغرور
وتجاهل ....بصه العميان
ليست هناك تعليقات:
إرسال تعليق