بينبِّت .. من أوّل وجديد
محمد على عزب
ألا أونا ..
الا دُوّا..
ألا تري ..
ف اٍزاز فترينه من الفتارين
المعروض فيها
بضايعهم
أو ف السيرميك
المتبطّن بيه
واجهة دكّان من دكاكينهم
ساعة ما صاحبنا يبصّ لروحه
بيشوف انه
ماشى فْ وسط جنازه
وأول حرف فْ اٍسمه
مكتوب ع النعشْ
فيقول :
ـ أخرتها كده
آه يا ولاد الكلب ..
طب ماشى
حطُّونى فْ أغوط حفره فْ بطن الأرض
وكمان
ما تخلّوش
فيضان النيل يوصلنى
لأ ..
لسه ما خلّصناش
ده انا روحى العطشانة
فيها جهاز استقبال
مظبوط
على أوّل نقطة ندى أو حبّة مطره
تنزل مطرح ما دفنتونى
وساعتها
صوتى وقلبى هيخضروا
وهانبّت ..
واطلع من أول وجديد ..
على وش الدنيا
مطرح مايجيى لى مزاجى
أغنّى
هاغنّى
وهاسمَّع طوب الأرض
النكت اللى باقولها عليكم
على ما يقدر صوتى
على قد ما يقدر هيغلوش
على صوت أى جرس
يعلن عن فتح مزاد
من مزادتكم
___________
19 مايو 2014م
ليست هناك تعليقات:
إرسال تعليق