30 مايو 2015
بدون عنوان
..........
من غير تقديم وبدون عنوان
احنا عايشين جو مصيبه
السجن كبير من غير سجَّان
والشعب حبيس جوه زكيبه
وشباب بتموت ف ميدان ولمان
والعيبة بتكتر ف الشيبه
وعساكر تسحل ف النسوان
وشيوخ منزوع منها الهيبه
تشهد بالزور لفلان وفلان
ضلالية بدقن وب زبيبه
وفلول وبياده وزيد إخوان
أصناف عايشين دنيا عجيبه
إعلام رقاص أشكال وألوان
تسمع له كأنك ف زريبه
يرقص للكل كما السعدان
فاضيين للكدب وللغيبه
والشعب الطيب ده غلبان
يتغاشموا عليه يزداد طيبه
ومقضي العمر ما بين عطلان
أو بين شقيان ف التغريبه
بيبيع العافية ف كل مكان
وبيدفع من عمره ضريبه
هاتقولوا دا جاهل أو متهان
هاتقولوا دا عيب ف التركيبه
آدي مصر بدون مساحيق ودهان
وبدون تزويق ..... احنا ف خيبة
ليست هناك تعليقات:
إرسال تعليق