عنوانــــي..
عنوان الشارع ما يتوِّهـش
البيت معروف
شبَّاك شقتنا بلون مخطوف
باب البيت منقوش بكفـوف
من أيام العز الغابر
لما دبحنا
ف مره خروف ..
بس الدبح ده كان له ظروفـُه
والإنسان بتقابله ظروف
ياللي بتسأل عن عنواني
أنا عنواني الشارع الاخضر
المتفرع من شرياني
بيتي مزيج من حِنـَّة وعنبر
والشِبـَّاك منقوش بأغاني
باب البيت مفتوح ومنوَّر
إطلع دوغري الدور التاني
بيتي بسيط أد ما تتصور
والمذكور صنـْعِتـُه حلواني
بَاسْقِي الناس من شهد مكرر
كَفـِّي سنين ممدود لجيراني
بس بوصفي الأخ الأكبر
ليـَّا عتاب عندكو يا اخواني
ياللي آذانك الله أكبر
وبتتكلم كده بلساني
وبتتوسل لله وحدُه
خـُد من قـُولي المعنى التاني
أي غريب يدخل وسطينا
إوعَى تصدَّق إنه معانا
ده ملعون أوي وابن لذِينَ
ندل حقير وبيتحدَّانا
يقتل فينا رضيعنا وشيخنا
وبنتلـَفـِّت مِنـُّه ورانا
عَندك جار في الآخِر جدا
حُط ما بينـُه وبينك حَدَّاً
إيَّاك ياخدك تحت عبايتـُه
واللا تصدَّق للسانـُه وعداً
ماسِك دايما سِبحَه ف إيدُه
لكن أصله قديما وغـْدَاً
عَندُه الظاهر غير الباطن
وبيخلِط سُمَّاً على شـَهـْدَاً
قبل طوفان الغدر ما يبدأ
فرَّق بين الآية والآية
آية ربَّك هيَّ المبدأ
آيه بعِمَّة وراها حكايه
قـُلت كلامي ورزقي على الله
حَق العيش والملح عليَّ
طـَبْ والله ما باقصُد إلا
إنـِّي أشوفكم كِدَه حواليـَّا
يَدِّنا واحده وقلبنا واحد
مُجْتـَمِعِين سَوَا ع الطبلية
إوعَى تصدَّق أيها واحد
لمـَّا يقولك كِلمة عليَّ
أنا ضحِّيت بالقـُوت علشانك
صاحي ونايم بالقومية
ودِّي أضمك ويـَّا اخوانك
نبقـَى قصيدة وبالعربية
إفتح وطني على أوطانك
شمس بلادنا ح تبقـَى عَفِيـَّة
واللي يعيش لبلاده وأهلـُه
عُمْرُه ف يوم ما تموت له قضيَّة
..................
أيمن عبد المقصود
عضو اتحاد كتاب مصر
ليست هناك تعليقات:
إرسال تعليق