من أول الجرح اللي فات ... قصيدة لـ: ماندو صابر
----------------------
من أول الجرح اللي فات
وانا قاعد استنى الفرج
بعد ما صدقت انه
(كان صرحاً من خيالٍ)
واتحرج ..
يعلن بانه كان سراب
من اول الجرح اللي فات
وانا بغزل المزيكا توب
تلبسها احلامي القديمة
والدروب الميتة في لحظة هروب
علشان يا دوب نرجع ندوسها من جديد
بخطاوي ينساها العديد
معذورة خطاوينا اللي فاتت
لما ماتت ع الطريق
معذورة احلام البريء
وبريئة من ظلم اتولد
قبل امّا نوصل لاتفاق
(سجل انا مصري) وزيّف ما تشاء
من أول الجرح اللي فات
محروم من الزاد لما تشبع
وهيه محرومة الآمان
والميعاد اللي اتولد من غير مكان
والبعاد اللى هيخلف ظننا ويرحل بعيد
والعناد اللي اتخطف من لحظة الألفة اللي بيننا
والكلام التمر حنة
والغزل
والجحود اللى اتعزل
آخر بلاد المسلمين مخلوق يا جيم
علشان تشوفك بس سين
كان اسمه ادهم او ياسين
مش مهم الاسم مين
المهم الوقت والصابر عليه
اما من ناحية مصيرنا هنلاقيه
صدقيني
هنلاقيه
****************
ماندو صابر
المهم الوقت والصابر عليه
ردحذفاما من ناحية مصيرنا هنلاقيه
صدقيني
هنلاقيه
الله عليك