شيزلونج
أشرف الشافعى
يومياً...
باطلع من روحى وباقعد قدامك
مرعوب من شكل الكرباج اللى ف نظرة عينك
زى التلميذ الخيبان الواقف قدام الناظر
وبيلعن أم اليوم اللى اتعلم فيه
.......
حاسس انى حاطرشق من كدبى عليكى
نجمى المشكوف قدامك
بيخوننى ويرمى ذنوبى ف حجرك
من غير تكليف
وكأنك حاجزة لنفسك بالكون جوايا
بتجيلك كل الخيانات منهارة ف لحظة
وبتفرد طولها قصادك ع الشيزلونج
و تحكى ...
انا كنت امبارح فين
بصيت إزاى
فكرت ف إيه !!
وكأنك واخدة العهد على فراغة عينى ...
تخر بكل صغيرة وكبيرة
مرات يخنقنى الشعر
ويسال
- هو انت صحيح مش قادر تكتب عنها؟
ولا انت بتتحجج بالحالة اللى بتفشل دايماً
تكتب عن حد قريب
وبتمنع سرسوب الشعر
اللى انت رجعت تحن لفضفضته معاك ؟!
....................
أوقات باتجن ف عقلى واقول
هو انا ...
مش زى بقيت الناس
من حقى أدخلى ف نزوة واعيش الحاله ؟
إيه اللى حيحصل يعنى ؟
لو مرة واعدت البنت
اللى انتى زمااااااااااااااان
كنتى اجمل منها
وقعدت معاها ف كازينو البانوراما ...
ف كامب شيزار ع البحر
ومسكت إيديها ..
بكل مراهقة تلاميذ الثانوى
وانا باصص للصخرة بتاعتك ..
من أيام خطوبتنا بغيظ ؟
فيها إيه لو مرة
دخلت السينما فى حفلة تسعة معاها
وخطفت هناك بوستين ع الماشى
او حتى مشيت وياها ف وسط الناس
وشافونى صحابك
يعنى حتتهد الدنيا ؟!
بس ارجع اقول :
- إتلم ياخايب ...
غلبانه ..وبتموت فيك
و انت اللى عبيط ...مش فاهم
طب عارفة
كتير والله استصغر نفسى
وأعمل...
حملة تطهير لموبايلى
وأقفّل كل ملفات الشغل المتكومة على راسى
وأجيلك جرى بتذكرتين السينما
تهاجمنى ملامحك ...
ببلادة تكشيرة واحد
ضاعت كل فلوسه ف سندات البورصة
وتفكرنى إن انا متعارك وياكى الصبح وناسى
أنزل للشارع وانا مخنوق ع الآخر
وف ايدى تذاكر السينما
أتندم ... إنى مسحت الارقام بغباوة
وافضل احايل مخى ...
ينز بكل صعوبة
رقم البنت اللى انا سبتها ملطوعة
ف كازينوا البانوراما إمبارح
فاكراها
اللى انتى زمان كنتى اجمل منها !!
أقابلها هناك ....
واقعد مش فاكر إسم الفيلم ف آخر الصالة
واخطف على سهوة ف نصه ...........
...........................
معقولة
تعبتى !!!
خلاص ..... انا آسف
مع انى ارتحت كتيييييييييييير دلوقت
وعذرت الخيانات اللى بتنهار قدامك
طب اقولك.. حاجة
- إيه رايك لو جربتى ....
ال ...
شيزلونج ...
مكانى .!!!!
ليست هناك تعليقات:
إرسال تعليق