انا حبه ورق مكتوب
واسمى مش شبهه شكلى
بحاول ارضى بالمكتوب
فيمكن بكره يندهلى
الليل نصير المظلومين
تحضن دموعهم ضلمته
يا مخرج الملايين لبكره تفتح سكته
الحق فجر مبين ملعون ابو من سكنته
بتمنى أشوفك فى منامى
واتوضا بنورك يا نبينا
واتكحل بالنسمة الجاية
من أشرف وأجل مدينة
ما انا عارف بصلاتى عليك
يوم حشرى وإيدك فى ايدينا
متلمش نفسك على طول الحياه
دا العمر فى بدايته منتهاه
ومتشغلكش تفاهات المسيره
وفكر ف ردك ساعة لقاه
اكتب فى سيره النبى تبقى الحروف تضحك
مدد يا سيد الخلق يالى الامين وصفك
حبك ف قلبى كان من قبل كونى يكون
يوم نلتقى ع الحوض يروينى نور كفك
يا روح ما بعدك روح
طلوعك بس ليه طول
بتتهجى مرار الجرح
والحيرة من الاول
يا إما تكونى قد الآه
يا إما تفارقى واستحمل
الحلم متكسَّر.. فتافيت من السُّكر
كان نفسى اكون إنسان.. قبل م اموت أكبر
بس القدر مكتوب.. حلمى يموت نونو
ماتوا كتييير قبلى ..إشمعنا انا هافضل
الشعر الأبيض .. من راسك طل
وسنين العمر.. عماله تقل
خطواتك تايهه.. واخداك للآخر
استسلم ليها.. او شفلك حل
انــــــــا مش ولى عشان اشوفك وارتدع
والهيت لك اللى بعيونك تغوى بالمليون جدع
ما انـــــــــــــا حتى لو دريت عيونى
صوتك "كمان" يعزف بـــــــــــــــدع
فاتح شبابيكى لشبابيكك
والايد مشتاقة لتشبيكك
والقلب العاشقك بالفطرة
خارج عن دايرة تشكيكك
بحبك حلم يملا الكون
بحبك واللى يجرى يكون
وزى ماكنت لى ليلى
هكونلك قيسك ال مجنون
بحبك والهوى ملكوت
وفربك الف عمر يفوت
حنينى فوق حدود وصفى
واكبر م الحياه وال موت
أنا العاشق ومش فارق أكون بعدك
وأنا التارك سنين حلمى عشان سعدك
وكيف بقدر أعدّى بحور
ومش قادر أكون قَدك
ثم كان العمر قبلك طيف وعدى
ثم شاف القلب صورتك ورده ندى
يلى شبهك م الملايكه
يوم لقاكى العمر يبدا
بين سطورى طــــالة انتى
بين ضلوعى ساكنـــة انتى
من ورايا حـــاطة ايدك
فوق عيونى !!! يبقى انتى
يا أم الجبين مرمرى حسنك حِتَت عنبر
كل البنات عشقونى وانا كنت بتكبر
بس امّا شفت آياتك
قلبى الصنم كَبّر
أنا العاشق ومش فارق أكون بعدك
وأنا التارك سنين حلمى عشان سعدك
وكيف بقدر أعدّى بحور
ومش قادر أكون قَدك
البت أم سبعتاشر.. دى الحلوة حبيبتى
بتحاصر قلبى ف صحيانى ونومتى
تهدينى من نور الشمس آهات
تنسينى إنها صاحبة بنتى
حصان حلاوة قلب الوله
دايب محبه وعشق ووله
يفتح ممالك صبر وحنين
وإذا احب يطير فى العلا
ثم كان العمر قبلك طيف وعدى
ثم شاف القلب صورتك ورده ندى
يلى شبهك م الملايكه
يوم لقاكى العمر يبدا
البنت النونو من قالب ســـــــكر
بتدوب ف كيانى من غير ما افكر
وبتعرف تدخل للقـــــلب ف ثانيه
وبتعرف تضــــــــــحك فالدنيا تنور
البـــنت النونو ف عنيــــها قصايد
والســـــــحر الساكن فيها الخالد
بيمطر روحى بنفحات دروايشى
ويرشرش قلبى بنورها الــــواعد
البنت النونو بعيون عسليه
انا احايل فيها فتعاند فيا
وغلب اراضيها والروح تناديها
بالشمس اهديها لو تأمر هيا
وكان نفسى اكون حسنايه فى خدودك
اكون رقصه على عودك
اكون طيف ف ايديكى متعطر
يدل الناس على وجودك
عادى جداً تفتحى الحلم تلاقينى
او تبصى جوا عينك تلقى عينى
برضو عادى لو تقولى الآه ف سرك
قلبى يتحول يمينى
الحب مش وجهات نظر
الحب صوت نبع القدر
ينده نجاوب من سكات
من غير بصيرة او بصر
كل السكك لعنيكى بتودى
وانا عشقتك وكان ودى
أكون ساكن دفا حضنك
يكون إسمك كلام وِردِى
اصــرخ زعـــق علىِّ ف حــــــسك
يمــكن حد ف يــوم هـــــــايحسك
بس تحاول مرة تحاور او تتناول شئ
مـــا يخصك ..... هــــاقطع حسك
يا معلمانى اكون صافى كما الصلوات
ليه ترضى إنى اكون عايش كما الاموات
يا شمس بكره وضى انتى اللى فات والجاى
رغم المرار شايفك طاهره كما عرفات
بحبك قبل لون نهرك
واشيل الكون على ضهرى فدا ضهرك
واموت عندى يكون أهون
ولا أشهد فى يوم نحرك
شهيد يامه دمعك ليه على خدك نازف
مهما رصاص بيعدى فى صدرى لأ مش خايف
بس أمانة عليكى ياأمى ساعة دفنى
برضو فى قبرى اكون انا واقف
متقولوش لبنتى مات قولولها حى
راح يجيب م الشمس نورها وبكرة جى
فهموها اللى مات عشان بلاده
يبقى فارس ملهوشى زى
ارسم بدمك وطن.. بس الوطن باقى
وبرغم ذل المحن.. غير حضنه ما تلاقى
بخل عليك بالكفن.. ارفع رياته لفوووق
زيك حزين الوطن.. زيك حزين باكى
نزل فى يوم جمعة مع ناس ميعرفهاش
عينيه مليها الآلم .. والحلم مش ببلاش
روحه تسيل منه ع الارض تصبح ضىّ
يا بكرة يااللى جىّ أمانة متنساناش
وبرغم كسر النفس.. جوايا قلب يحس
وأمل ف حتة وطن.. يطبطب عليا وبس
أجرى عليه يفرح ينده على إسمى
وأما اموت لاجله.. دقيقة يبطل رقص
اوطانى وبتوضا بصوتها
تحلالى فـ ثورة وفـ سكوتها
واتمرجح فـ مشانق يمكن
مرجحتى تحرك دمعتها
ربى إنى مسنى الشعر وانت الرحيم بيا
نظم الكلام جوا القصيد غيا
يا مكممين الحرف جونا تفتكروا
الحلم يتحقق بمجرد النيه
**********************
محمد عبد الرازق حسن
ليست هناك تعليقات:
إرسال تعليق