...مُنتهى العشق ...
حبك يا غالية مرمطني
وفرهدني وبهدلني
ومرمرني وفرفرني
وهدّاني وجنني
وسهرني ما شوفتش نوم
وخلاّني أنام مهموم
وعيّاني ومنه شفيت
وضحكني ومنه بكيت
وشرّقني وغرّبني
لكن من تاني رجّعني
وخلاّني أقول الآهة
من قلبي
سمعتيها ولا وقفتي
ف يوم جنبي
ولا مديتي يوم أيدك
ولا حنيتي لوليدك
وأنا بصرخ
أنا تعبان
أنا الشّقيان
... تعبتيني ...
وأنا الغلبان وضهري
انحنى بسببك
وضاعت صحتي
ف حبك
وبرضوا بأتهم فيكي
بأني العاشق الولهان
عشقتيني ... كسرتيني
يا نقطة ضعفي وأميرتي
يا مصدر قوّتي وحيرتي
... غلبتيني ...
قسيتي عليّا قولت كمان
ولوّنتي القسا ألوان
سألتك ليه ما رديتي
وسبتيني آَهَاتي وقول
تعبت خلاص
وراح صوتي
فقولت خلاص أنا ماشي
وللقسوة ما هـا نساشي
لكنّي برضه ما اقدرتش
عشان حُبك دا جوايا
معشش فيّا ومكلبش
ورغم القسوة
من اهلك
ورغم التوهه
في أرضك
أنا عاشق
جمال أمك
ووقت الشدة تلاقيني
حافظ أرضك
صاين عرضك
ساكن حبك شراييني
أنا فاكرك ...
ولو حتى هتنسيني
***************
***********
***
أحمد عتريس
1/7/2011
ليست هناك تعليقات:
إرسال تعليق