من وحــــــي روحك
نفس الإيقاع الكئيب
كل ليله ..
والعزف داير من وحي روحك
بتغني لجروحك ..
ف نفس المكان
ولنفس الجمهور
من نفس السواد الجسور ..
بيأسس الليل دولته ..
صبّاره ..
ف البساتين , الغنوتين السهرانين ,
الكفّتين الشقيانين / دنيتك
وانا والحياه شاهد مَلك ..
مجنون
ع القهوه التاريخ طلب ينسون
مش عاوز يفتكر حاجه
ف المولد اللي إتنصب
والبيّاعين ببلاش
وإحنا البيّاعين ومابعناش حاجه
دايرين ندور ف الهوا
والحلم لسّه بعيد ..
خطوتين / يمكن , ندهتين / يمكن
وكان ممكن يكون ف الإيد
لكن البعيد لسّه ..
والطيبين لسّه ..
والعمر فيه غُصّه محشوره ف سكتك
وأنا والحياه ..
والعزف داير ..
ليست هناك تعليقات:
إرسال تعليق