باكو شيكولاته
من طفلة إلى والدها الذى أبعد عنها لظرف ما
شعر: مجدى عبد الرحيم
وحدى فِ البلكونه ..
بالعَب ويَا عروستى ..
اللى دايمًا بتونِسنِى ..
و بتحرسِنى
و مَامَا فِ الصَاله
بتضحَك مع عَمو
اللى لابس بيجامه بيضَا
زى بتاعتك يا بَابَا
وأنا زعلانة خالص ..
من عَمو
علشان بينام ..
دلوقتى مكانى
و مَامَا قالت لِى :
حَ تنامى لوحدك ف الأوضه
وأنا خايفه يا بَابَا
م العفاريت
لمَّا بتغضب منى ..
كانت بتخوفنى بالعفاريت
دلوقتى بتقول لَى :
مفيش حَاجَه إسمهَا عفاريت
كلام مَامَا إتغير ليه يا بَابَا
هو صحيح العفاريت ..
بتموت
. . . . . . . . . . . .
عَمو جَاب لِى شِيكولاته
زى بتاعتك ..
لكن ..
طعمها مُش حلو
و مَامَا عايزانى أقوله ..
يا بَابَا
طب إزاى ..
هو فيه ف الدنيَا حَد
ليه إتنين أب
مَامَا زعلت منى
وعَمَّاله تعيط
. . . . . . . .
إمبارح رحت معَاهم ..
حديقة الحيوان
إستنيتك عند الفيل
يمكن تيجى ..
زى زمَان
على فكره الفيل ..
كان زعلان ..
و مكشر
و رافض ياخد أكل ف زلومته
هو الفيل برضه ..
بَابَاه مسافر
و قاعد ويا عَمو ومَامته
. . . . . . . . . .
طب كلمنى ف التليفون ..
زى الأول
و لا أقولك سر خطير
إنت واحشنى بجد يا بَابَا
نفسى أشوفك ..
واسمع صوتك
ف البلكونة حَ ستناك
و هَات لِى معاك
باكو شيكولاته
وحضن كبير
ليست هناك تعليقات:
إرسال تعليق