عارفه؟
كل الحاجات
كانت بتسأل عن حاجات فيكى اختفت
كل الحاجات
خانت فعز عيون حبيبتى ماوفت
وانا زيهم
باسأل ومش لاقى الجواب
فين ياترى القلب اللى ياما ف قلبى داب
ليه اختفا.
ليه اللى فاضل منه حيرتى
ليه لما باسرح فيه ساعات فجأه ابتسم
ليه بالقى فرحه ف ننى عينى بتترسم
ليه فجأه باصحى من عيونك ع الغياب
عارفه؟
مستنى اشوفك
حتى لو كان ع الورق
وانا باكتب السطر اللى حبك كل يوم
وانا باكوى قمصانى ف دولاب الذكريات
وانا باشرب القهوة الزياده ف مكتبى
حتى وانا باصص ف عين كل البنات
يمكن الاقى عنيكى فيهم برضه بتدور عليا
وترجع العمر الجميل اللى اتسرق
عارفه؟.....
أنا ياما عيشت احلم أشوف ضلك رجع
ولا نابنى من الأحلام سوا كتر الوجع
أضحك لقلبى واحضنه
واقوله ماتفوق ياجدع
دى الفرحه رزق وخدت رزقك وانتهى
وانت اللى ياما دوقت سكر قلبها
سيبها بقا وبطل طمع
.......................((عمرو عفيفى ))
ليست هناك تعليقات:
إرسال تعليق